Bedford Falls-მა დაანონსებული ალბომიდან ახალი სიმღერა SMENA და მასზე შექმნილი მუსიკალური ვიდეო გამოაქვეყნა. ვიზუალურ ნამუშევარში გამოყენებული ილუსტრაცია ნინო ბერიძეს ეკუთვნის, ხოლო ანიმაციაზე თათა მანაგაძემ იმუშავა.
რაც შეეხება ბენდის მომავალ ალბომს, მისი სახელწოდებაა Lazy Bones, საიდანაც ჯგუფს ამ დროისთვის სულ სამი სინგლი აქვს გამოშვებული.
2025 წლის დეკემბერში Bedford Falls ჟურნალ Billboard Georgia-ს რედაქტორის წარდგენით, გლობალურ Billboard-ზე მოხვდა. მსოფლიოში ერთ-ერთი ყველაზე გავლენიანი მუსიკალური მედიის მეშვეობით ქართული ჯგუფი მრავალმილიონიანმა აუდიტორიამ გაიცნო.
Bedford Falls 2014 წელს შეიქმნა. ბენდის შემადგენლობაში არიან: დათო (ვოკალი), მიხო (გიტარა), სანდრო (დრამი და ბექვოკალი) და მიგრო (ბასი). ბენდის სახელწოდება შთაგონებულია ფრენკ კაპრას საკულტო ფილმით It’s a Wonderful Life, რომლის მოქმედებაც გამოგონილ ქალაქში – Bedford Falls-ში ვითარდება. ამ ქალაქის იდეა ჯგუფის იდენტობის მნიშვნელოვან ნაწილად იქცა, რადგან Bedford Falls არის ადგილი, სადაც ადამიანების ცხოვრება ერთმანეთთან მჭიდროდ არის დაკავშირებული.
