ნიკი მინაჟის მხარდაჭერა დონალდ ტრამპის მიმართ გრძელდება. 28 იანვარს ვაშინგტონში გამართულ Trump Accounts Summit-ზე რეპერი პრეზიდენტს სცენაზე შეუერთდა.
ეს საპრეზიდენტო სამიტი ნიკი მინაჟისთვის ტრამპთან პირისპირ შეხვედრის პირველი შემთხვევა იყო. ღონისძიების მსვლელობისას პრეზიდენტმა საჯაროდ აღნიშნა მინაჟის მხარდაჭერა მისი ადმინისტრაციის მიმართ და არტისტი „ისტორიაში ყველაზე დიდ და წარმატებულ ქალი რეპერად“ მოიხსენია.
ტრამპის თქმით, მინაჟი „ასობით ათას დოლარს აბანდებს Trump Accounts-ში“, რათა მხარი დაუჭიროს იმ ბავშვებს, რომლებიც არტისტის ფანები არიან. „ვფიქრობ, რომ ის შესანიშნავია,“ – განაცხადა პრეზიდენტმა.
შემდეგ ტრამპმა მინაჟი მოულოდნელად მიიწვია სცენაზე სიტყვით გამოსასვლელად, სადაც მას Shark Tank-ის ვარსკვლავი კევინ ო’ლირიც შეუერთდა. მინაჟმა საკუთარ თავს დონალდ ტრამპის „№1 ფანი“ უწოდა და აღნიშნა, რომ არსებული კრიტიკა კიდევ უფრო ამყარებს მის მხარდაჭერას პრეზიდენტისადმი.
„ალბათ პრეზიდენტის ნომერ პირველი ფანი ვარ,“ – მიმართა მინაჟმა აუდიტორიას. „და ეს არ შეიცვლება. რასაც ხალხი ამბობს, საერთოდ არ მოქმედებს ჩემზე. პირიქით – კიდევ უფრო მეტ მოტივაციას მაძლევს, რომ მეტი მხარდაჭერა გამოვუცხადო მას.“
მან ასევე დაამატა: „არც ცილისმწამებლურ კამპანიებს ექნება შედეგი. მის უკან დიდი ძალა დგას და ღმერთი იცავს.“
Nicki Minaj on Trump: “I am probably the president’s number one fan — and that’s not going to change.” pic.twitter.com/v3hk0S2rkQ
— philip lewis (@Phil_Lewis_) January 28, 2026
24 იანვარს ცნობილი გახდა, რომ მინაჟი ფინანსთა სამინისტროს სამიტს დაესწრებოდა, არტისტმა X-ზე განმარტა, თუ რამდენად მნიშვნელოვანია მისთვის ფინანსური განათლება და სურვილი, ეს ცოდნა სხვებსაც გაუზიაროს.
„ადრეული ფინანსური განათლება და ფინანსური მხარდაჭერა ჩვენს ბავშვებს ცხოვრებაში დიდ უპირატესობას მისცემს. ზოგ შემთხვევაში ისინი საკუთარ მშობლებსაც კი ასწავლიან, როგორ და რაში ჩადონ ინვესტიცია. ეს ძალიან მაბედნიერებს.“
ბოლო თვეებში მინაჟი არ ერიდება ტრამპის ადმინისტრაციის ღია მხარდაჭერას. მან საჯაროდ შეაქო პრეზიდენტი ნიგერიაში ქრისტიანების სავარაუდო დევნის გამო სამხედრო ჩარევის მუქარისთვის. არტისტი ასევე დაესწრო გაეროს ღონისძიებას, რომელიც აშშ-ის ელჩმა მაიკ უოლცმა მოაწყო, სადაც ამ საკითხზე ცნობიერების ამაღლებაზე ისაუბრა.
„მსურს მადლობა გადავუხადო პრეზიდენტ ტრამპს ამ საკითხის პრიორიტეტად ქცევისთვის – რათა ნიგერიაში ქრისტიანები დაიცვას, ექსტრემიზმს დაუპირისპირდეს და ის ძალადობა შეაჩეროს, რომელიც მიმართულია იმ ადამიანების წინააღმდეგ, ვისაც უბრალოდ რელიგიური თავისუფლება სურს,“ – განაცხადა მინაჟმა.
დეკემბერში მინაჟმა არიზონაში გამართულ Turning Point USA-ის ღონისძიებაზე კიდევ ერთხელ შეაქო ტრამპი და მასთან ერთად ვიცე-პრეზიდენტი ჯეი დი ვენსი. მინაჟის თქმით, ის ორივე მათგანით ამაყობს. „ორივე მიყვარს. ორივეს აქვს საოცარი უნარი, იყოს ადამიანი, რომელთანაც მარტივად აიგივებ თავს.“
