ჰილარი დაფი მსოფლიო ტურნეს გეგმავს. მომღერალმა მუსიკაში დაბრუნება გასულ წელს დააანონსა. მან სექტემბერში Atlantic Records-თან გააფორმა კონტრაქტი და მალევე გაამხილა მომავალი ალბომის დეტალებიც – luck… or something 20 თებერვალს გამოვა. ამ ეტაპზე ჰილარი დაფმა უკვე ორი სინგლი გამოუშვა: Mature და Roommates.
2026 წლის დასაწყისისთვის აშკარა გახდა, რომ დაფი სცენაზე დასაბრუნებლად მზად იყო. იანვარში მან ოთხქალაქიანი მინი-ტური დაიწყო, რომლის ფარგლებშიც ლონდონში, ტორონტოში, ბრუკლინსა და ლოს-ანჯელესში გამოვიდა. ხოლო მშობლიურ ქალაქში, ჰიუსტონში გამართული ფინალური კონცერტისთვის განსაკუთრებული სიურპრიზიც შემოინახა.
შოუს შუა ნაწილში, სადაც ჰიტები შესრულდა, დაფმა სცენაზე სამი იღბლიანი ფანი მოიწვია და მათთან ერთად იცეკვა. ქორეოგრაფიის შესრულების შემდეგ, თითოეულ მათგანს მადლობის ნიშნად საჩუქარი გადასცა. სავსე დარბაზისკენ ზურგშექცეულ ფანებს მან შავი მაისურები გადასცა და სთხოვა, არ შემოტრიალებულიყვნენ, სანამ ნიშანს არ მისცემდა. როგორც კი ანიშნა, სამივე ფანი ერთდროულად შემოტრიალდა და აუდიტორიას მნიშვნელოვანი სიახლე გაუმხილა – მაისურებზე გამოსახული იყო სამი სიტყვა: “World Tour Loading…”
ამას დარბაზში აპლოდისმენტებისა და შეძახილების ტალღა მოჰყვა. „ეს დაუჯერებელი შეგრძნებაა. ვერ ვიჯერებ, რომ 18 წლის შემდეგ აქ ვარ,” – თქვა მან მოგვიანებით. სხვადასხვა დროს, Billboard Hot 100-ის ჩარტში ჰილარი დაფის შვიდი სიმღერა მოხვდა, ხოლო მისი ხუთივე ალბომი Billboard 200-ის ტოპ 5-ში შევიდა. ალბომებმა – Metamorphosis (2003) და Most Wanted (2005) კი ჩარტის პირველი ადგილიც დაიკავეს.
