ლეიბლმა For No Reason პროექტის Araushavs ფარგლებში, ამავე სახელწოდების მქონე ახალი მუსიკალური ვიდეო და სინგლი წარადგინა. ეს სადებიუტო ალბომის (Araushavs) მეორე მუსიკალური ვიდეოა, რომელიც 2026 წლის გაზაფხულზე როგორც ციფრულ პლატფორმებზე, ასევე ვინილის სახითაც იქნება ხელმისაწვდომი.
სანდრო თედიაშვილის, გვანცა ენუქიძისა და ზურაბ ბაბუნაშვილის კოლაბორაცია ამჯერადაც იმ ხელწერას ინარჩუნებს, რომელიც ექსპერიმენტულ იმპროვიაზაციასა და უშუალო ემოციებზეა დაფუძნებული.
სანდრო თედიაშვილის – ლეიბლ for no reason records-ის დაფუძნებლის თქმით, შემოქმედებითი პროცესი ხშირად წინასწარი დაგეგმვის გარეშე, სპონტანურად იწყება.
„ახალი ნამუშევარი საკმაოდ ბუნებრივად და ინტუიციურად შეიქმნა. თავიდან არ გვქონდა კონკრეტული კონცეფცია ან წინასწარ ჩამოყალიბებული ნარატივი, უფრო განწყობიდან და იმ ემოციებიდან წამოვიდა, რასაც იმ მომენტში ვგრძნობდით. ხშირად სწორედ ასე ვმუშაობთ და ალბათ ამ მიდგომას კარგად გამოხატავს ლეიბლის სახელიც – For No Reason: რაღაცები იწყება თითქოს უმიზეზოდ, ინსტინქტურად, და მნიშვნელობას პროცესში იძენს.
გადაღების დროს კადრების 90 პროცენტი იმპროვიზაციული იყო, ერთი კადრის გარდა, წინასწარ არაფერი გვქონდა დაგეგმილი.”
აღსანიშავია ის ფაქტიც, რომ როგორც პირველ, ასევე მეორე მუსიკალურ ვიდეოშიც ძაღლის მოტივი ფიგურირებს, რაც, ერთი შეხედვით, შესაძლოა სიმბოლური მნიშვნელობითაც აღიქმებოდეს.
„ვიდეოში ძაღლის მოტივი თავიდან უბრალოდ ვიზუალური ელემენტი იყო, მაგრამ პროცესში შეიძლება სიმბოლურ დატვირთვადაც წაიკითხოს – სიმშვიდე, ერთგულება, ერთგვარი სტაბილურობა გარემოს ფონზე. გვგონია, რომ ამ ნამუშევრებში მნიშვნელოვანია მაყურებლის პირადი აღქმაც და თავისუფლად ვტოვებთ სივრცეს სხვადასხვა ინტერპრეტაციისთვის.”
Araushavs-ის მუსიკალურ ვიდეოზე შიო ხიდაშელმა იმუშავა, მიქსინგი ზურაბ ბაბუნაშვილს ეკუთვნის, ვიდეოში გამოყენებული ნიღაბი კი ანა ხმალაძის ნამუშევარია.
ნახეთ მუსიკალური ვიდეო:
