Bad Bunny-ს ალბომი Debí Tirar Más Fotos 2026 წლის გრემის დაჯილდოების საუკეთესო ურბანული მუსიკის გამარჯვებული გახდა. მუსიკოსს ჯილდო კეროლ ჯიმ და Saturday Night Live-ის მსახიობმა მარსელო ერნანდესმა გადასცეს. ბანიმ სცენიდან საკმაოდ ემოციური სიტყვა წარმოთქვა, რომელშიც აშშ-ის საიმიგრაციო სამსახური მკაცრად გააკრიტიკა.
„სანამ ღმერთს მადლობას გადავუხდი, მანამდე საიმიგრაციო სამსახურს ვეტყვი, მოშორდეს!” – თქვა მან, რასაც დარბაზის ფეხზე მდგომი ოვაციები მოჰყვა. „ჩვენ არ ვართ ველურები, არ ვართ ცხოველები, არც უცხოპლანეტელები, ჩვენ ადამიანები ვართ და ჩვენ ამერიკელები ვართ. ვიცი, რომ დღეს რთულია, სიძულვილს არ განიცდიდე და ხანდახან ამ ყველაფრით ვბინძურდებით. სიძულვილი კიდევ უფრო ძლიერდება სიძულვილით. ერთადერთი რამ, რაც სიძულვილზე ძლიერია, სიყვარულია. ამიტომ გთხოვთ, ვიყოთ განსხვავებული. თუ ვიბრძვით, ეს სიყვარულით გავაკეთოთ. ჩვენ ისინი არ გვძულს, ჩვენ გვიყვარს ჩვენი ხალხი, გვიყვარს ჩვენი ოჯახი და ესაა სწორი გზა – სიყვარული. მადლობა ღმერთს და მადლობა აკადემიას.”
Debí Tirar Más Fotos 2025 წლის ლათინური ალბომების ჩარტისა და Billboard 200-ის ლიდერი გახდა. ეს უკვე მესამე შემთხვევაა, როცა გრემის ურბანული მუსიკის ნომინაციას Bad Bunny იგებს. 2023 წელს მან გაიმარჯვა ალბომით Un Verano Sin Ti, ხოლო 2022 წელს – ალბომით El Último Tour del Mundo. მანამდე, 2021 წელს, მისმა მეორე ალბომმა YHLQMDLG საუკეთესო ლათინური პოპ/ურბანული ალბომის ჯილდო დაიმსახურა.
საერთო ჯამში, Bad Bunny, რომელიც 8 თებერვალს 2026 წლის Super Bowl Halftime Show-ზე წარდგება, სამი გრემისა და 17 ლათინური გრემის მფლობელია, მათ შორისაა წლის ალბომის ჯილდო პროექტისთვის Debí Tirar Más Fotos.
ექვსი კატეგორიით ბანი წელს ერთ-ერთი ყველაზე მეტი ნომინაციის მქონე არტისტი იყო კენდრიკ ლამარისა (9 ნომინაცია) და ლედი გაგას (7 ნომინაცია) შემდეგ. მუსიკოსი წარდგენილი იყო დიდი ოთხეულის სამ კატეგორიაში: წლის ალბომი (Debí Tirar Más Fotos), წლის ჩანაწერი და წლის სიმღერა (DtMF).
