2026 წლის გრემის საუკეთესო ახალი არტისტის კატეგორია ბოლო წლებში ერთ-ერთი ყველაზე კონკურენტული იყო. ლეონ თომასი ექვსი ნომინაციით იყო წარმოდგენილი – ეს კატეგორიაში წელს წარდგენილ შემსრულებლებს შორის ყველაზე მაღალი მაჩვენებელია. თუმცა გამარჯვება ბრიტანელ მომღერალს, ოლივია დინს ერგო.
ჰიტის – Man I Need-ის ემოციური შესრულების შემდეგ, 26 წლის ლონდონელმა არტისტმა აღნიშნა, რომ ვერც კი წარმოედგინა, ოდესმე გრემის სცენაზე თუ აღმოჩნდებოდა.
„მე აქ ვარ, როგორც ემიგრანტის შვილიშვილი,“ – თქვა მან, რასაც დარბაზში მქუხარე აპლოდისმენტები მოჰყვა. ეს განცხადება განსაკუთრებულად მნიშვნელოვნად ჟღერდა აშშ-ში მიმდინარე მოვლენების ფონზე, რომლებიც ტრამპის ადმინისტრაციის მიერ გამკაცრებულ საიმიგრაციო პოლიტიკას უკავშირდება – იანვარში ამ ქმედებებს მინეაპოლისში ამერიკის ორი მოქალაქის სიცოცხლე შეეწირა.
„მე ადამიანების სიმამაცის შედეგად ვდგავარ აქ და ვფიქრობ, ასეთი ადამიანები აღიარებას იმსახურებენ. ერთმანეთის გარეშე ჩვენ არაფერს წარმოვადგენთ,” – მიმართა მუსიკოსმა აუდიტორიას.
მისი სიტყვები კიდევ უფრო ემოციური გახდა იმის გათვალისწინებით, რომ დარბაზში მყოფი არაერთი ვარსკვლავი შავ-თეთრ ნიშნებს – „ICE Out“-ს ატარებდა. ეს სიმბოლო აშშ-ის მასშტაბით საიმიგრაციო და საბაჟო სამსახურის (ICE) რეიდების წინააღმდეგ მიმდინარე პროტესტის ნაწილია.
ოლივია დინმა გამარჯვება მოიპოვა იმ ნომინაციაში, რომელშიც წარდგენილი იყვნენ: ლოლა იანგი, K-pop ჯგუფი KATSEYE, sombr, The Marías, ედისონ რეი და ალექს უორენი.
ცერემონიაზე საუკეთესო ახალი არტისტის ყველა ნომინანტმა იმღერა, ხოლო დინმა საღამო დახურა თავისი ჰიტით Man I Need, რომელმაც გასულ წელს Billboard Hot 100-ის მეორე ადგილი დაიკავა.
როგორც საღამოს წამყვანმა ტრევორ ნოამ აღნიშნა, წლევანდელი საუკეთესო ახალი არტისტის ნომინანტებს საერთო ჯამში 225 მილიონზე მეტი გამომწერი ჰყავთ სოციალურ ქსელებში, ბოლო ერთი წლის განმავლობაში მათი ტრეკები 27 მილიარდჯერ არის სტრიმინგ სერვისებზე მოსმენილი, ხოლო წლევანდელ გრემიზე მათ ერთად 18 ნომინაცია დაიმსახურეს.
