ალექს უორენმა გრემის დაჯილდოებაზე გამოსვლის დროს წარმოქმნილ ტექნიკურ პრობლემებზე ისაუბრა, რომელიც მის პერფორმანსს დაემთხვა.
მომღერალი და სიმღერების ავტორი 2026 წელს ნომინირებული იყო კატეგორიაში „საუკეთესო ახალი შემსრულებელი“. ტელეგადაცემის დროს, სიმღერა Ordinary-ს შესრულებისას, არტისტს სასმენ მონიტორებთან აშკარა პრობლემა შეექმნა. ღონისძიება პირდაპირ ეთერში ლოს-ანჯელესის Crypto.com Arena-დან გადაიცემოდა აუდიო ხარვეზები ტრანსლირების დროსაც შესამჩნევი იყო. ალექს უორენი გამოსვლისას საკუთარ ყურსასმენთან გამკლავებას ცდილობდა.
ცერემონიის შემდეგ მან ინსტაგრამის საშუალებით განმარტა, თუ რა მოხდა სინამდვილეში. არტისტმა გააზიარა ვიდეო, სადაც ნაჩვენებია ის, რაც მას გამოსვლისას ყურსასმენში ესმოდა. „როდესაც გრემის სცენაზე გამოდიხარ და ყურსასმენში მხოლოდ ეს გესმის,“ – დაწერა მან ვიდეოს აღწერაში, სადაც სიმღერა ხარვეზით და დაგვიანებით ისმის.
შემდეგ კი ალექს უორენმა დაამატა: „ეს მხოლოდ მე თუ შემემთხვეოდა…“
პერფორმანსის დროს უორენმა შეცვალა ყურსასმენი და საბოლოოდ ერთ-ერთი მონიტორი საერთოდ მოხსნა, რამაც დროებით ხმის ასინქრონიზაცია გამოიწვია. ტექნიკური გაუმართაობის შესახებ ოფიციალური განცხადება ამ ეტაპზე არც ხმის ჩამწერ აკადემიას და არც ტრანსლაციის პარტნიორ CBS-ს არ გაუკეთებია.
მიუხედავად შეფერხებისა, ეს გამოსვლა ალექს უორენისთვის გრემის სცენაზე პირველი ცოცხალი შესრულება იყო. „საუკეთესო ახალი არტისტის“ კატეგორიაში მისი ნომინაცია წარმატებულ წელს მოჰყვა, რომელიც Ordinary-თ დაიწყო, – სიმღერა Billboard Hot 100-ის ჩარტში 10 კვირის განმავლობაში პირველ ადგილზე პოზიციონირებდა.
ამ ნომინაციაში ჯილდო საბოლოოდ Olivia Dean-ს გადაეცა, რომლისთვისაც ეს წელი მნიშვნელოვან ფესტივალებზე გამოსვლებითა და ალბომ The Art of Loving-ის გამოცემით დასრულდა.
