ნიკი მინაჟის უახლეს ინტერვიუს მაყურებელი პოდკასტში იხილავს. დაანონსებულ ინტერვიუში ნიკი საუბრობს იმაზე, თუ რატომ გადაწყვიტა, ბოლო პერიოდში უფრო აქტიურად ჩართულიყო კონსერვატიულ პოლიტიკაში. მან განმარტა, რომ ამის მიზეზი არა პრეზიდენტის პოლიტიკა, არამედ ის იყო, თუ როგორ ეპყრობოდა ტრამპს საზოგადოება და სწორედ ამან შთააგონა მისი საჯაროდ მხარდაჭერა.
პოდკასტის წინასწარ გავრცელებულ ფრაგმენტებში, რომლებიც რეპერმა 2 თებერვალს X-ზე გააზიარა, მინაჟი პოდკასტის წამყვანის, ქეთი მილერის კითხვებს პასუხობს. სრული ჩანაწერი სამშაბათს გამოქვეყნდება. ინტერვიუში არტისტი საუბრობს, თუ რატომ გრძნობს, რომ პოლიტიკა ახლა მისი მოწოდებაა. როდესაც ნიკის ჰკითხეს, ტრამპის რომელმა პოზიციამ მოახდინა მასზე განსაკუთრებული გავლენა – იმიგრაციის პოლიტიკამ თუ „რელიგიურმა თავისუფლებამ“, მინაჟმა უპასუხა: „რელიგიური თავისუფლება ჩემთვის ძალიან მნიშვნელოვანია, მაგრამ თუ გულწრფელი ვიქნები, როცა ვხედავდი, საზოგადოება მას როგორ ექცეოდა, უბრალოდ ვეღარ ვუძლებდი. ბულინგი, შავი პიარი და მუდმივი ტყუილები – ეს ყველაფერი წლების განმავლობაში მეც გამომივლია. როცა ვუყურებდი, როგორ ხდებოდა იგივე სხვა ადამიანთან მიმართებით, ვფიქრობდი, რომ ის ამას არ იმსახურებდა,” – განმარტა ნიკი მინაჟმა.
X-ზე გამოქვეყნებულ კიდევ ერთ ვიდეოში მინაჟი ყვება, როდის დაიწყო ტრამპის პოლიტიკაზე განსაკუთრებული ყურადღების გამახვილება. მისი თქმით, ბოლო საპრეზიდენტო კამპანიის დროს რაღაც გარემოება შეამჩნია, რამაც პოლიტიკაში ჩართვისაკენ უბიძგა, თუმცა არ გაამხილა, კონკრეტულად რომელ ფაქტს გულისხმობდა.
„შემდეგ, რამდენიმე თვის წინ, კიდევ რაღაც მოხდა,“ – განაგრძო მან და დეტალებზე კითხვისას განაცხადა: „ამაზე საუბარი არ მინდა. ვიტყვი მხოლოდ იმას, რომ ზოგჯერ ადამიანები გიბიძგებენ, რომ პირდაპირ შენი მოწოდებისკენ წახვიდე. ზუსტად ეს დამემართა.“
რეპერმა ინტერვიუს ფრაგმენტის ვიდეოს თან დაურთო წარწერა: „თქვენ შეგიყვარდებათ ეს ინტერვიუ, Barbz. ეს არის პატარა ანონსი.“
ეს ინტერვიუ მას შემდეგ დაანონსდა, რაც მინაჟი პრეზიდენტთან ერთად Trump Accounts Summit-ზე გამოჩნდა. სამიტზე მუსიკოსმა განაცხადა: „ალბათ, მე ვარ პრეზიდენტის ნომერ პირველი ფანი.“
მალევე მინაჟმა X-ზე გაამხილა, რომ ტრამპმა მას Trump Gold Card გადასცა, რომლის მიღება 1 000 000 დოლარის შემოწირულობას და დამატებით 15 000 დოლარის ადმინისტრაციულ გადასახადს მოითხოვს. Gold Card-ის აღწერის მიხედვით, ის წარმოადგენს „ვიზას, რომელიც ეფუძნება ინდივიდის შესაძლებლობას, მნიშვნელოვანი სარგებელი მოუტანოს შეერთებულ შტატებს“. შესაბამისად, Gold Card-მა შესაძლოა ტრინიდადში დაბადებული ნიკი მინაჟისთვის აშშ-ის მოქალაქეობის მიღება დააჩქაროს.
როგორც მინაჟი, ისე ტრამპი უკმაყოფილო დარჩნენ გრემის დაჯილდოების ცერემონიით, რომელიც 1-ელ თებერვალს გაიმართა და რომლის დროსაც წამყვანმა ტრევორ ნოამ სარკასტულად მოიხსენია რეპერისა და პრეზიდენტის ახალი ალიანსი. კომიკოსმა ტრამპის იმიტაციით წარმოიდგინა მათი დიალოგის თავისებური ინტერპრეტაცია: „სინამდვილეში, ნიკი, მე მაქვს ყველაზე დიდი საჯდომი! ყველა ამას ამბობს, ნიკი. ვიცი, ამბობენ, თითქოს შენია, მაგრამ მე მაქვს!“
ამის შემდეგ ნიკი მინაჟმა X-ზე პოსტების სერია გამოაქვეყნა, რომელშიც ბრაზი გამოხატა, ხოლო ტრამპმა Truth Social-ზე დაწერა: „გრემის დაჯილდოება არის ყველაზე ცუდი, ფაქტობრივად შეუძლებელია მისი ყურება! CBS-ს გაუმართლა, რომ ამ ნაგავს მათ ეთერში აღარ გაუშვებენ.“
