1 თებერვალს გრემის დაჯილდოებაზე, მეტალის ლეგენდა ოზი ოსბორნისადმი მიძღვნილი პერფორმანსის დროს, შერონ ოსბორნს თვალზე ცრემლი მოადგა, როდესაც მუსიკოსებმა Black Sabbath-ის War Pigs-ის შესრულებით ოზი ოსბორნის ხსოვნას პატივი მიაგეს.
მომდევნო დღეს კი შერონ ოსბორნმა ინსტაგრამზე პოსტი გამოაქვეყნა: „გუშინდელი საღამო შესრულებაზე ბევრად მეტი იყო. ეს იყო მომენტი, რომელიც მუსიკის ისტორიაში სამუდამოდ ჩაიწერა. მომენტი რომელმაც ყველას შეგვახსენა, რომ როკი ნოსტალგია არ არის – ის ცოცხალია, ვითარდება და კვლავ მუსიკის მთავარ გულისცემაად რჩება“.
მისი საქებარი სიტყვები გრემის იმ პერფორმანსს მიეძღვნა, რომელიც დაჯილდოების ტრადიციული ნაწილის, გარდაცვლილ ხელოვანთა ხსოვნისადმი მიძღვნილი – In Memoriam-ის ფარგლებში გაიმართა. სცენაზე Post Malone-სა და Guns N’ Roses-ის გიტარისტ Slash-ს გვერდს უმშვენებდნენ Red Hot Chili Peppers-ის დრამერი ჩად სმიტი, Guns N’ Roses-ის ბასისტი დაფ მაკაგანი და პროდიუსერი ენდრიუ ვატი. აღსანიშნავია, რომ სწორედ ვატი იყო ოზი ოსბორნის ბოლო ორი სტუდიური ალბომის – Ordinary Man-ის (2020) და Patient Number 9-ის (2022) პროდიუსერი.
მძიმე როკის ამ შვიდეულმა Black Sabbath-ის 1970 წლის ანტისაომარი ჰიტსიმღერა შეასრულეს, სადაც Post Malone ვიეტნამის ეპოქის დღემდე აქტუალურ ტექსტებს იმ პოლიტიკოსების მისამართით იმეორებდა, ვინც სამუშაო მაგიდებს ეფარებიან და ღარიბ, ახალგაზრდა ჯარისკაცებს სასიკვდილოდ იმეტებენ. (war just for fun/ Treating people just like pawns in chess.)
შერონმა ინსტაგრამზე ხელახლა გამოაქვეყნა კადრი პერფორმანსიდან, სადაც მისი და მისი შვილების ემოციური რეაქციაა ასახული.
„Post, შენ ნამდვილი ჯადოქარი ხარ, ადამიანი-ქამელეონი, შენი ხმა ნებისმიერ ჟანრში ტრანსფორმირდება. Slash, დაფ, ენდრიუ, ჩად – თქვენ თქვენი საქმის დიდოსტატები და ნამდვილი ლეგენდები ხართ. გულწრფელად, გიხდით მადლობას. ოზი ამ საღამოს ნამდვილად ჩვენთან ერთად იყო ამ დარბაზში“.
გასულ კვირას შერონ ოსბორნი Billboard-ის Power 100-ის ღონისძიებაზე მუსიკალურ ინდუსტრიაში შეტანილი უდიდესი წვლილისთვის დაჯილდოვდა. მან პრესტიჟული ჯილდო – Visionary Award მიიღო, რომელიც კლაივ დევისმა და მიშელ ენტონიმ გადასცეს.
გრემის პერფორმანსით ჯეკ ოსბორნიც აღფრთოვანებული დარჩა. მან საკუთარ ინსტაგრამზე მისი ოჯახის ემოციური კადრები შემდეგი წარწერით გააზიარა: „არავითარი შენიშვნა – ყველაფერი იდეალური იყო“.
