დონალდ ტრამპმა Bad Bunny-ს Super Bowl Halftime Show საჯაროდ გააკრიტიკა.
პრეზიდენტმა ბანის გამოსვლის შემდეგ სოციალურ ქსელში საკუთარი რეაქცია გააზიარა და დაწერა, რომ პუერტო-რიკოელი ვარსკვლავის შოუ „აბსოლუტური საშინელება” იყო.
„Super Bowl Halftime Show აბსოლუტური საშინელებაა, ერთ-ერთი ყველაზე ცუდი, რაც კი ოდესმე ყოფილა! მას არავითარი აზრი არ აქვს, ეს ამერიკის დიდების შეურაცხყოფაა და არ ასახავს წარმატების, კრეატიულობისა და სრულყოფილების ჩვენეულ სტანდარტებს,” – დაწერა ტრამპმა მას შემდეგ, რაც ბანის გამოსვლა ეთერში გავიდა.
„ერთი სიტყვაც კი არავის ესმის იქიდან, რასაც ეს ბიჭი ამბობს,” – აღნიშნა პრეზიდენტმა, მიუხედავად იმ ფაქტისა, რომ აშშ-ში მცხოვრები 44.8 მილიონი ადამიანი ესპანურ ენაზე საუბრობს. „ცეკვა საშინელია, განსაკუთრებით პატარა ბავშვებისთვის, რომლებიც შოუს უყურებენ აშშ-სა და მთელ მსოფლიოში. ეს შოუ უბრალოდ სილის გაწვნაა იმ ქვეყნისთვის, რომელიც ყოველდღიურად ახალ სტანდარტებსა და რეკორდებს ამყარებს, მათ შორისაა ისტორიაში საუკეთესო საფონდო ბაზარი და საპენსიო ფონდი!”
ტრამპმა დაამატა: „არაფერია შთამაგონებელი ამ შოუს აურზაურში, მაგრამ ნახეთ, ის დიდებულ შეფასებებს დაიმსახურებს ყალბ ახალ ამბებში, რადგან მათ არ აქვთ წარმოდგენა, თუ რა ხდება რეალურ სამყაროში. და, სხვათა შორის, NFL-მა დაუყოვნებლივ უნდა შეცვალოს თავისი ახალი, სასაცილო Kickoff-ის წესი.”
„ბილბორდი” კომენტარისთვის Bad Bunny-ს დაუკავშირდა. ჯერჯერობით მუსიკოსს პრეზიდენტისთვის საჯაროდ არ უპასუხია.
Halftime Show, რომელიც ერთ-ერთი ყველაზე სპეციფიკურად კულტურული ღონისძიება იყო Super Bowl-ის ისტორიაში, დიდწილად Bad Bunny-ს პუერტო-რიკოულ მემკვიდრეობას ეყრდნობოდა და რეგეტონს, ლათინურ ტრეპსა და კარიბიულ რითმებს მასშტაბურ ქორეოგრაფიასთან აერთიანებდა. შოუ მოიცავდა მოულოდნელ ნომრებს ლედი გაგასა და რიკი მარტინიგან, ასევე ქარდი ბის კამეოს – მომენტს, რომელსაც სოციალურ მედიაში დიდი გამოხმაურება მოჰყვა.
Bad Bunny – ბენიტო ანტონიო მარტინეს ოკასიო – გასული დეკადის ერთ-ერთი ყველაზე კომერციულად წარმატებული არტისტია. ის გამუდმებით ხვდება „ბილბორდის” ჩარტების სათავეში და ფლობს Billboard 200-ის რამდენიმე ლიდერ ალბომს, მათ შორის Un Verano Sin Ti და Nadie Sabe Lo Que Va a Pasar Mañana. მისი მუსიკა დაეხმარა ესპანურენოვან რელიზებს აშშ-ის მეინსტრიმ პოპსა და ჰიპ-ჰოპში მოხვედრაში.
ტრამპის კომენტარები მოჰყვა შოუს გარშემო არსებულ პოლიტიკურ ინტერესს, რომელმაც კონსერვატორებში დებატები გამოიწვია. ზოგიერთ მემარჯვენე ჯგუფი NFL-ის მიერ ლათინური არტისტების წარმოჩენის ძალისხმევას აკრიტიკებდა, მეორე ნაწილი კი ეჭვქვეშ აყენებდა Bad Bunny-ს, როგორც ქვეყნის კულტურული ელჩის როლს, მიუხედავად მისი აშშ-ის მოქალაქეობისა (პუერტო-რიკო აშშ-ის ტერიტორიაა).
ბოლო წლებში NFL-მა Halftime Show-ებში კიდევ უფრო გაზარდა გლობალური და მულტიკულტურული წარმომადგენლობა, რაც ასახავს ლიგის გაცხადებულ მიზანს, გაზარდოს მისი საერთაშორისო წვდომა. 2023 წლიდან შოუს ოფიციალური სპონსორი Apple Music-ია, გამომსვლელების შერჩევა კი ჯეი-ზის Roc Nation-თან თანამშრომლობით ხდება.
პრეზიდენტის კრიტიკის მიუხედავად, მაყურებლის პირველი რეაქციები შოუზე პოზიტიური იყო. კონცერტის ვიდეოები კი მთელი ღამის განმავლობაში სოციალური პლატფორმების ტრენდებში ხვდებოდა.
