7 თებერვალს Lana Del Rey-მ სოციალურ ქსელებში ვიდეო გააზიარა, სადაც მომავალი ალბომიდან Stove თავისი ფავორიტი სიმღერის სათაური და გამოსვლის თარიღი დააანონსა. გავრცელებულ ვიდეოში მომღერალმა აღნიშნა, რომ ეს სწორედ ის კომპოზიციაა, რომელსაც ყველაზე მეტად ელოდა:
„მინდოდა, პატარა გზავნილი დამეტოვებინა და მეთქვა, რომ ჩემი ახალი სინგლი, ახალი ალბომიდან ჩემი ყველაზე საყვარელი სიმღერა სწორედ ეს არის, რომელსაც ასე დიდხანს ველოდი. White Feather Hawk Tail Deer Hunter 17-ში გამოვა.” – აღნიშა მან, თუმცა კონკრეტული თვის დასახელებისგან თავი შეიკავა, სავარაუდოდ კი საუბარი თებერვალის თვეზეა.
მომღერალმა აღნიშნა, რომ ტრეკზე პროდიუსერებთან, დრიუ ერიქსონთან და ჯეკ ანტონოფთან ერთად მუშაობდა, რომლებმაც ბოლოს და ბოლოს იპოვეს ის მაგიური აკორდი, რომელიც კომპოზიციას აკლდა. სიმღერის თანაავტორები მისი მეუღლე ჯერემი დიუფრენი, მისი სიძე და მისი და ქეროლაინ Chuck გრანტი არიან, ხოლო მიქსინგზე დინ რეიდმა და ლორა სისკმა იმუშავეს.
Lana Del Rey-მ თავის მომავალ, რიგით მე-10 ალბომსა და ახალ სინგლზე დამატებითი დეტალებიც გაასაჯაროვა. შავ-თეთრ ვიდეორგოლში მომღერალმა აღნიშნა, რომ სიმღერაში სხვა ადამიანების მიერ ჩამატებული არაერთი ფრაზა და დეტალი ფიგურირებს. მან ასევე აღნიშნა, რომ სინგლისთვის White Feather Hawk Tail Deer Hunter მუსიკალური ვიდეო უკვე გადაღებულია.
რაც შეეხება მომღერლის მომავალ, მეათე ალბომს, Lana Del Rey-მ მიანიშნა, რომ ის შესაძლოა უახლოეს თვეებში გამოვიდეს.
„ვიცი, რომ ალბომზე მეკითხებით, მაგრამ გულწრფელად რომ ვთქვა, ვფიქრობ, მალე გამოვა. ვინილის დაბეჭდვას სამი თვე სჭირდება, ასე რომ, სამი თვე და ორი კვირა. შეიძლება, ცოტა ნაკლებ ან ცოტა მეტ დროშიც ჩავეტიოთ.“
Lana Del Rey-მ ქანთრი ალბომი თავდაპირველად 2024 წლის იანვარში Billboard x NMPA Songwriter Awards-ზე დააანონსა. მისი თქმით, თავდაპირველად ალბომის სახელწოდება Lasso უნდა ყოფილიყო, რომლის გამოსვლაც 2024 წლის სექტემბერში იგეგმებოდა.
ალბომის პირველი სინგლი Henry, Come On მომღერალმა 2025 წლის აპრილში გამოაქვეყნა, მაშინ პროექტს უკვე შეცვლილი სახელწოდება The Right Person Will Stay ერქვა. მოგვიანებით მომღერალმა პროექტი კვლავ გადადო. საბოლოოდ ალბომს Stove ეწოდა.
„სიმღერები იმაზე მეტად ავტობიოგრაფიული აღმოჩნდა, ვიდრე მეგონა და ამას მეტი დრო დასჭირდა. ალბომის უმეტეს ნაწილს ქანთრის ჟღერადობა ექნება. რვა წლის წინ, როცა ქანთრი ალბომის გაკეთებაზე ვფიქრობდი, ამას სხვები არც კი განიხილავდნენ. ახლა კი ყველა ქანთრისკენ მიისწრაფვის.” – უთხრა Lana Del Rey-მ ჟურნალ W-ს 2025 წლის აგვისტოში, როცა ალბომის გამოსვლა კვლავ გადაიდო.
