კრუზ ბეკჰემი, როგორც ჩანს, რომანტიკული ადამიანია. ახალი სინგლი for your love, რომელიც დღეს, 13 თებერვალს გამოსცა, ვალენტინობის დღისთვის მისი წინასწარი გზავნილია.
სიმღერის თანაავტორები და პროდიუსერები ჯასტინ რეისენი და ლუის პესაკოვი არიან. for your love მოსდევს კრუზის სადებიუტო სინგლს Optics, რომელიც 2025 წლის ოქტომბერში Lick The Toad-თან ერთად გამოსცა.
სიმღერას თან ახლავს მუსიკალური ვიდეოც, რომელშიც ბეკჰემი თავის ბენდ Breakers-სთან ერთად ჩნდება და რომელშიც მისი ბაბუის კამეოსაც იხილავთ.
„მიყვარს ეს სიმღერა,” – ამბობს კრუზი. „ძალიან სახალისო იყო ბოლო რამდენიმე თვის განმავლობაში მისი ლაივში დაკვრა. ეს პირველი სიმღერაა, რომელიც სათანადოდ დავასრულე ჯასტინსა და ლუისთან ერთად, რომლებიც ნამდვილი ლეგენდები არიან. ჩვენ გავაცნობიერეთ, რომ ეს ნამუშევარი გახდებოდა საფუძველი იმ ყველაფრისა, რასაც ერთად შევქმნით. ჩემთვის ეს სიმღერა სიყვარულსა და ამ სიყვარულში უშიშრობაზეა, მაგრამ იმედი მაქვს, მასში ყველა საკუთარ ინტერპრეტაციასა და მნიშვნელობას იპოვის.”
როგორც ამბობენ, ვაშლი ხიდან შორს არ ცვივა. ბეკჰემი ვიქტორიას უმცროსი ვაჟია – Spice გოგონასი, რომელმაც 1990-იან წლებში პოპსამყაროში ქალთა ძალა დაამტკიცა. კრუზის მამა კი ყოფილი საფეხბურთო ვარსკვლავი დევიდ ბეკჰემია.
ახალი სიმღერის მხარდასაჭერად კრუზი მომდევნო თვეში დიდი ბრიტანეთისა და ევროპის ტურნეში გაემგზავრება. პირველი შოუ 27 მარტს არის დაგეგმილი. წარმომადგენლების თქმით, ბილეთები რამდენიმე წუთში სრულად გაიყიდა.
კრუზ ბეკჰემის ლაივდებიუტი გასულ წელს შედგა. მან წინასწარი დაანონსების გარეშე კონცერტების სერია ბრიტანეთის რამდენიმე ქალაქში გამართა.
„ძალიან მიხარია ტურნეში ყოფნა. ყოველთვის შთაგონებული ვიყავი ბენდებით, რომლებიც ამას სწორად აკეთებდნენ და მეც მინდა ბევრი პატარა კონცერტის გამართვა,” – წერს ბეკჰემი განცხადებაში. „მოუთმენლად ველი ფანებთან შეხვედრასა და მათთვის ჩემი სიმღერების შესრულებას. ვერ ვიჯერებ, რომ ადამიანებმა თავიანთი შრომით მოპოვებული თანხა ჩემი და ჩემი ბენდის სანახავად დახარჯეს, ამიტომ ჩვენ ბოლომდე დავიხარჯებით ამ შოუზე! აღტაცებული ვარ, რომ ჩვენი, The Breakers-ის ბანერი გვაქვს. აქამდე მხოლოდ სხვა არტისტეის მხარდამჭერი ბენდი ვიყავით, ახლა კი პირველად გვავქვს საკუთარი ბანერი.”
მოუსმინეთ for your love-ს:
