Billboard-ის Friday Music Guide მოსახერხებელი მუსიკალური გზამკვლევია, რომელიც კვირის განმავლობაში მნიშვნელოვან მუსიკალურ რელიზებსა და ახალ პროექტებს მიმოიხილავს.
ამ კვირაში Charli XCX ნანატრ პროექტს, Wuthering Heights-ს აქვეყნებს, რომელიც ამავე სახელწოდების, ემერალდ ფენელის რეჟისორობით გადაღებული ფილმისთვის შეიქმნა. MUNA-მ მეოთხე ალბომი Dancing On The Wall დააანონსა, რომელიც 8 მაისს გამოვა და ამავე დროს, ალბომში შესული ტრეკი გამოაქვეყნა, ხოლო Flea-მ, მომავალი ინსტრუმენტული სოლო ალბომის გამოსვლამდე, ფრენკ ოუშენის კლასიკური სიმღერის საკუთარი ვერსია გააზიარა.
Charli XCX – Wuthering Heights
მას შემდეგ, რაც Charli XCX-მა გასულ ნოემბერს ალბომისა და ფილმის მუსიკალური მიმართულება გაგვაცნო სიმღერებით: House და Chains of Love, არტისტმა იანვარში Wall of Sound გამოუშვა. დღეს კი, როდესაც მისი ალბომი ოფიციალურად გამოვიდა და ამავე სახელწოდების ფილმის პრემიერა კინოთეატრებში შედგება, Charli XCX-მა კინემატოგრაფიული და ჰაეროვანი ჟღერადობის სიმღერა – Always Everywhere გააზიარა. სიმღერა წამყვან ფლეილისტებში საპატიო ადგილს იკავებს.
ნოემბერში გავრცელებულ პრესრელიზში მომღერალმა აღნიშნა, რომ რეჟისორი ემერალდ ფენელი მას 2024 წლის შობას დაუკავშირდა და ფილმისთვის სიმღერის დაწერა შესთავაზა. „სცენარის წაკითხვისთანავე შთაგონება ვიგრძენი. წინა ალბომზე მუშაობის შემდეგ, როცა სრულად ჩაფლული ვიყავი მის სამყაროში, ძალიან გამიხარდა ახალ და სრულიად საპირისპირო მიმართულებაში გადასვლა.“ – აღნიშნა Charli XCX-მა.
MUNA – Dancing On The Wall
პოპ-ტრიო MUNA ამ კვირაში მომავალ მეოთხე ალბომში შესული სიმღერით ბრუნდება. ტრდიციულად, სინგლი სევდიან, ემოციურად მძაფრ განწყობასა და ენერგიულ ჟღერადობას აერთიანებს, რომელსაც კეტი გევინის გამორჩეული ვოკალი ერთვის. ბენდმა განცხადებაში აღნიშა, რომ „Dancing On The Wall შესაძლოა ჩვენი ფავორიტი სიმღერაა მათ შორის, რაც კი ოდესმე ბენდს შეუქმნია… მასში MUNA-ს ყველა საუკეთესო მხარეა თავმოყრილი“.
ტრეკის პროდიუსერი ჯგუფის წევრი ნაომი მაკფერსონია.
Bleachers – You and Forever
Bleachers-მა თავისივე სახელის მქონე ალბომი 2024 წლის მარტში გამოუშვა. ორი წლის შემდეგ ჯგუფმა მეხუთე სტუდიური ალბომი Everyone for Ten Minutes დააანონსა, რომლის გამოსვლაც 22 მაისს იგეგმება.
ალბომის წამყვანი სინგლია You and Forever, რომლის პროდიუსერიც და ავტორიც ბენდის დამფუძნებელი წევრი ჯეკ ანტონოფია. როკჟღერადობის მქონე ტრეკი თავისი ღრმა და მრავალშრიანი ვოკალით გარკვეულწილად The National-ის სტილს მოგაგონებთ. სიმღერა სიყვარულის იდუმალ, მოჩვენებით და შემზარავ მხარეზე გვიყვება.
„მიუხედავად იმ მომენტებისა, როდესაც ის წამიერად სიბნელეში იხედება, არსებითად, ეს მაინც ოპტიმისტური ჩანაწერია, რომელიც სიყვარულითა და იმედითაა შთაგონებული. ალბომი ჰარმონიულ ფოლკ-როკს, ბრჭყვიალა პოპ-სოულს და საქსოფონის თანხლებით შექმნილ ნიუ-ჯერსისეულ ჟღერადობას აერთიანებს, რომელიც Bleachers-ის სავიზიტო ბარათად იქცა“. – აღნიშნულია ალბომის შესახებ გამოქვეყნებულ პრესრელიზში.
Lykke Li – Lucky Again
„მე ჩემს ეგზისტენციალურ ერაში შევდივარ,“ – განაცხადა Lykke Li-მ და ამ სიტყვებით მომავალი ალბომის, The Afterparty-ს გამოსვლა დააანონსა, რომელიც 8 მაისს გამოქვეყნდება.
Lucky Again ამ ახალი ეპოქის პირველი ნამუშევარია – ეიფორიული, იმედიანი და ოდნავ თავბრუდამხვევი. „ეს არის სამსარა ერთ სიმღერაში. ცხოვრების ბორბალი: მოგება, წაგება, სიცოცხლე, სიკვდილი. რაღაცის ქონა და ლოცვა, რომ ის კვლავ დაგიბრუნდეს.“ – დასძინა არტისტმა, სიმღერის შესახებ, რომელიც სიკვდილისა და ხელახალი დაბადების დაუსრულებელ ციკლზე გვიყვება.
Flea – Thinkin Bout You
Flea-ს მუსიკალური კარიერა Red Hot Chili Peppers-თან ერთად გატარებულ ოთხ ათწლეულზე მეტს ითვლის, რომლის შემდეგაც ჯგუფის დამფუძნებელი წევრი Flea თავის მუსიკალურ ფესვებს – ჯაზს უბრუნდება. როდესაც მას 60 წელი შეუსრულდა, გადაწყვიტა, დრო აღარ დაეკარგა და დადო პირობა, რომ ორი წლის განმავლობაში ყოველდღე საყვირზე დაკვრაში ივარჯიშებდა – და ასეც მოიქცა. შედეგად კი მისი სადებიუტო სოლო ალბომი Honora მივიღეთ, რომელიც მარტში გამოვა.
ალბომში Flea-ს მიერ შექმნილი და არანჟირებული ექვსი საავტორო კომპოზიციაა გაერთიანებული, ასევე მისი ინტერპრეტაციები საყვარელ სიმღერებზე, მათ შორის ფრენკ ოუშენის Thinkin Bout You. „როცა ალბომი Channel Orange გამოვიდა, ჩემზე უზარმაზარი შთაბეჭდილება მოახდინა. ალბათ ათ მილიონჯერ მაქვს მოსმენილი… Thinkin Bout You ამ ალბომის ერთ-ერთი გამორჩეული სიმღერაა და ვიფიქრე, რომ საინტერესო იქნებოდა მისი საყვირზე შესრულება.“ – აღნიშნა არტისტმა.
Circus Mircus – I’m A Man
11 თებერვალს Circus Mircus-მა ახალი EP გამოსცა. ჩანაწერი, სახელწოდებით Akhalteke, ოთხ სიმღერას აერთიანებს. დღეს კი ჯგუფმა პროექტის პირველი სინგლი I’m A Man და მასზე გადაღებული ვიდეოკლიპი გააზიარა. „ჩვენი ახალი EP-ის ¼,” – ვკითხულობთ აღწერაში. მუსიკალური ვიდეო კი ერთ უწყვეტ, სტატიკურ კადრად არის გადაღებული.
