მაიკლ ჯექსონის მემკვიდრეობის წარმომადგენლებმა ოფიციალურად გააკრიტიკეს Sexyy Red-ის მიერ Beat It-ის „უხამსი” ინტერპრეტაცია, მას შემდეგ რაც რეპერის ახალი ტრეკის – Just Eat It-ის ვიდეო გავრცელდა.
Billboard-თან გაკეთებულ განცხადებაში მაიკლ ჯექსონის მემკვიდრეობის წარმომადგენელმა აღნიშნა: „ამის შესახებ საერთოდ არ ვიყავით ინფორმირებული. ამ მუსიკის გამოყენება არ არის ავტორიზებული.“ Billboard კომენტარისთვის Sexyy Red-ის წარმომადგენლებსაც დაუკავშირდა.
არსებული ინფორმაციით, ნაკლებად სავარაუდოა, რომ მომღერალი ოფიციალურ ნებართვას მიიღებს Just Eat It-ის ციფრულ პლატფორმებზე გამოსაცემად, რადგან ჯექსონის სამემკვიდრეო ფონდს ამ პროექტზე თანხმობა არ გაუცია.
ვიდეოს გამოცემამდე Lil Yachty-მ ინსტაგრამზე გამოაქვეყნა ვიდეო, სადაც Sexyy Red სტუდიაში მაიკლ ჯექსონის ჰიტის საკუთარ ვერსიას ასრულებს. ვიდეო სწრაფად გავრცელდა და ჯექსონის ფანების მძაფრი კრიტიკა გამოიწვია, განსაკუთრებით მას შემდეგ, რაც Yachty-მ აღწერაში ირონიულად მიანიშნა, რომ ეს რემიქსი შესაძლოა მაიკლ ჯექსონის შესახებ გადაღებული ბიოგრაფიული ფილმის საუნდტრეკებს შორის მოხვედრილიყო.
Sexyy Red-მა მოგვიანებით თავადაც გამოაქვეყნა კიდევ ერთი ვიდეო, რომელშიც Just Eat It-ს ასრულებს და ხუმრობით დაწერა, თითქოს ეს „შემთხვევით გავრცელებული კადრები“ მაიკლ ჯექსონის ფილმიდან იყო.
ვიდეოს რეპის პიონერი Monie Love-იც გამოეხმაურა და სემპლის ასეთი გამოყენება საჯაროდ გააკრიტიკა. მისი თქმით, ეს ნაბიჯი „უკიდურესი უპატივცემულობაა“ და მაიკლ ჯექსონის სახელთან და მუსიკალურ მემკვიდრეობასთან ასეთი დამოკიდებულება მიუღებელია.
აღსანიშნავია, რომ Sexyy Red-ს წარსულში საჯაროდ გამოუხატავს სიმპათია მაიკლ ჯექსონის მიმართ. ნოემბერში, სენტ-ლუისში გამართულ კონცერტზე, მან სცენაზე მიიწვია მაიკლ ჯექსონის იმიტატორი რიკო ჰემპტონი, რომელმაც Billie Jean შეასრულა.
Beat It 1982 წელს გამოვიდა. სინგლი შესულია ალბომში – Thriller. ის მალევე მოექცა Billboard Hot 100-ის სათავეში და პოპ-მუსიკის კლასიკად იქცა.
