13 თებერვალს Tatuza Jazz Club-ში ბრიტანული ჯაზის გამორჩეული ხელოვანის – დენის როლინსის მუსიკალური საღამო გაიმართა. კლუბმა არტისტს პირველად უმასპინძლა. დენის როლინსი BBC Jazz Award-ის გამარჯვებული ტრომბონისტია, რომელმაც მნიშვნელოვნად შეცვალა ტრომბონის როლი ჯაზისა და ფანკის სცენაზე.
ის თანამშრომლობდა ისეთ შემსრულებლებთან, როგორებიც არიან: Brand New Heavies, Jamiroquai, კორტნი პაინი, მეისეო პარკერი და Pee Wee Ellis.
დენის როლინსმა თავის ბენდის წევრებთან ერთად Tatuza Jazz Club-ის სცენაზე მუსიკალური პროექტი წარადგინა. კოლექტივის შემადგენლობაში იყვნენ: დენის როლინსი – ტრომბონი, ჯეიმს მორტონი – ალტო საქსოფონი, ალექს ჰაჩინგსი – გიტარა, ტიაგო კოიმბრა – ბასი, ანდერს ოლინდერი – კლავიში, დავიდე ჯოვანინი – დრამი.
თბილისში გამართული საღამოსა და მუსიკალური პროგრამის შესახებ დენის როლინსი Billboard Georgia-ს ესაუბრა:
„დღევანდელი მუსიკალური პროგრამა სხვადასხვა არტისტის ნამუშევრებს აერთიანებს. შევასრულეთ რამდენიმე კლასიკური ფანკ ნაწარმოები. პროგრამა ასევე მოიცავდა ჟანრის დიდებულ პიონერებს, მაგალითად ჯეიმს ბრაუნს, ასევე მეისეო პარკერს, რომელთან თანამშრომლობის პატივი მეც მქონდა. ამ პროგრამით სწორედ იმ გამორჩეულ მუსიკოსებს მივაგეთ პატივი, რომლებმაც ფანკის განვითარებაში მნიშვნელოვანი როლი ითამაშეს.
რაც შეეხება დღევანდელ საღამოს, Tatuza Jazz Club მართლაც გამორჩეული სივრცეა – აქ შესანიშნავი აკუსტიკა და ატმოსფეროა. ყველაზე მნიშვნელოვანი კი ის არის, რომ აქ მაყურებლის ენერგიას გრძნობ და მათთან ემოციურ კავშირს მარტივად ამყარებ. გამიკვირდა, როცა გავიგე, რომ ეს ადგილი ახლახან გაიხსნა – მას უკვე კარგად დამკვიდრებული ჯაზ-კლუბის სახე აქვს.“
