ტეილორ სვიფტის Opalite ახალი NBC Olympics-ის პრომოს საუნდტრეკად იქცა. ვიდეოში პოპვარსკვლავი წარადგენს აშშ-ის ფიგურული სრიალის გუნდის წევრებს – ალისა ლიუს, ემბერ გლენსა და იზაბო ლევიტოს – სამეულს, რომელსაც „The Blade Angels“-ის სახელითაც იცნობენ.
„ქალბატონებო და ბატონებო, მინდა გაგაცნოთ ემბერი, ალისა და იზაბო – სამი ამერიკელი შოუ-გოგონა ყინულზე, რომლებიც თავიანთი ისტორიებით თქვენს გულებს მოიგებენ,“ – ამბობს სვიფტი ვიდეორგოლის ტექსტში. კლიპი 16 თებერვალს გავრცელდა და მოკლედ გვიყვება აშშ-ის გუნდის სამი მოციგურავის ისტორიას.
ემბერ გლენზე საუბრისას სვიფტი ამბობს: „ემბერი მოგიყვებათ, თუ როგორ ჰქონდა წაგებას მისთვის ისეთივე მნიშვნელობა, როგორც გამარჯვებას. მისი სუპერძალა დღეს არის ბრძოლისთვის მზადყოფნა და საკუთარი რწმენის გამოცდა.“
„რაც შეეხება ალისას, მან 16 წლის ასაკში შეწყვიტა ფიგურული სრიალი, თუმცა მოგვიანებით საკუთარი პირობებით დაბრუნდა. ახლა მისი ყოველი ნახტომი ზეიმია. ყოველი გამოსვლა – საკუთარი თავის შეცნობა,“ – ამბობს სვიფტი.
„და – იზაბო. მისი ისტორია ფაქტობრივად ბედისწერაა. მისი დედა მილანში გაიზარდა, ხოლო ბებია, სახელად ნონა, ოლიმპიური არენიდან ზუსტად 13 წუთის სავალზე ცხოვრობდა. როდესაც ისე სრიალებ, თითქოს სწორედ ეს გიწერია, ისტორიას ერთი უცნაური თვისება აქვს – საჭირო დროს ყოველთვის იჩენს თავს.“
სვიფტმა ცოტა ხნის წინ გამოუშვა თავისი უახლესი სინგლის – Opalite-ის მუსიკალური ვიდეო. 2026 წლის ზამთრის ოლიმპიურ თამაშებზე ის აქტიურად უჭერს მხარს აშშ-ის სპორტული გუნდის წევრებს. თებერვლის დასაწყისში NBC-ის გახსნის ცერემონიაზე გავიდა ვიდეო, სადაც სვიფტი ოლიმპიურ სპორტსმენებს წარმატებას უსურვებს.
იხილეთ სვიფტის მიერ გახმოვანებული NBC Olympics-ის ახალი პრომო.
