პოპვარსკვლავი და სიმღერების ავტორი SIA გახდა პირველი შემსრულებელი, რომელმაც ავსტრალიელი მუსიკოსების „გლობალური გავლენის სიაში“ (Global Impact List) პირველი ადგილი ორჯერ დაიკავა. მისი და დევიდ გუეტას კოლაბორაცია – Beautiful People რეიტინგის სათავეში მოხვდა. აღნიშნული სია ავსტრალიელი არტისტების მოსმენების გლობალური მონაცემების საფუძველზე დგება, თუმცა მასში უშუალოდ ავსტრალიის მასშტაბით მოსმენების რაოდენობა არ შედის.
SIA-მ რეიტინგის პირველი ადგილი 2023 წელსაც დაიკავა ჰიტით – Gimme Love.
ამავდროულად, კევინ პარკერის ფსიქოდელიური პროექტი Tame Impala უახლეს ტოპ 50-ში შთამბეჭდავად არის წარმოდგენილი შვიდი სიმღერით, რომლებიც შესულია მის მეხუთე სტუდიურ ალბომში – Deadbeat. აქედან ოთხი კომპოზიცია პირველ თხუთმეტეულში მოხვდა, მათ შორის Dracula, რომელმაც მე-2 ადგილი დაიკავა.
The Kid LAROI კიდევ ერთი ავსტრალიელი შემსრულებელია, რომელიც Spotify-ზე დიდი საერთაშორისო გავლენით სარგებლობს. სიდნეიში გაზრდილი და ამჟამად ლოს-ანჯელესში მცხოვრები მომღერალი სიაში შვიდი ტრეკით არის წარმოდგენილი.
„შეუძლებელია, არ იგრძნო ავსტრალიური მუსიკის გავლენა, სადაც არ უნდა წახვიდე – იქნება ეს აშშ, ევროპა თუ განვითარებადი ბაზრები, სადაც ადგილობრივი არტისტები ახალ ფანებს იძენენ,” – განაცხადა Spotify-ს ავსტრალიისა და ახალი ზელანდიის (AUNZ) შემსრულებლებთან და ლეიბლებთან პარტნიორობის განყოფილების ხელმძღვანელმა, ლია ჰარისმა.
„მონაცემები ცხადყოფს, თუ რამდენად უსაზღვრო გახდა მუსიკა და როგორ ამყარებენ ავსტრალიელი არტისტები მსმენელებთან უფრო ღრმა კავშირს, ვიდრე ოდესმე,” – აღნიშნავს ჰარისი.
სტრიმინგის გიგანტის ანგარიშის მიხედვით, 2025 წელს ავსტრალიელი არტისტებისთვის ნომერ პირველი საექსპორტო ბაზარი აშშ იყო, შემდეგ კი გაერთიანებული სამეფო და გერმანია. საუკეთესო ათეულში ასევე მოხვდნენ ბრაზილია, მექსიკა, ფილიპინები და საფრანგეთი. ბოლო სამი წლის განმავლობაში ყველაზე სწრაფად მზარდი საექსპორტო ბაზრებია სამხრეთ აფრიკა (+99%), ფილიპინები (+64%) და კოლუმბია (+53%).
გასულ კვირას Spotify-მ გამოაცხადა, რომ მეოთხე კვარტალში გამომწერთა და ყოველთვიური აქტიური მომხმარებლების ზრდის მაჩვენებლმა პროგნოზებს გადააჭარბა. 2025 წლის ბოლო სამ თვეში კომპანიამ 290 მილიონ პრემიუმ-გამომწერს მიაღწია, რაც 10%-იანი წლიური ზრდაა. ყოველთვიური აქტიური მომხმარებლების (MAUs) რაოდენობა კი 11%-ით გაიზარდა და 751 მილიონი შეადგინა.
