კარიერის განმავლობაში U2 მუდამ იჩენდა გამბედაობას, დაეფიქსირებინა საკუთარი შეხედულება მსოფლიოში არსებული მდგომარეობის შესახებ. და სამყაროში, რომელიც ბოლო დროს ხშირად ჭკუიდან გადასულს ჰგავს, 18 თებერვალს ვეტერანმა ბენდმა ეს კიდევ ერთხელ გააკეთა და მოულოდნელი EP გამოსცა, სახელწოდებით Days of Ash.
ჩანაწერში შესული ხუთი სიმღერა და პოემა აღწერილია, როგორც „დაუყოვნებლივი პასუხი მიმდინარე მოვლენებზე, შთაგონებული იმ გასაოცარი და მამაცი ადამიანებით, რომლებიც თავისუფლების ფრონტის წინა ხაზზე იბრძვიან.”
გავრცელებულ განცხადებაში ბონო წერს: „Days of Ash-ის სიმღერები ძალიან განსხვავდება განწყობითა და თემატიკით იმ კომპოზიციებისგან, რომლებსაც ამ წლის შემდეგ ალბომში შევიტანთ. ეს სიმღერები ვერ დაიცდიდნენ. ისინი რაც შეიძლება მალე უნდა გამოსულიყვნენ დღის სინათლეზე. ეს არის წინააღმდეგობის, წუხილისა და გლოვის სიმღერები. მათ აუცილებლად მოჰყვება საზეიმო სიმღერებიც, მათზე ახლა ვმუშაობთ… რადგან ყველა იმ საშინელების მიუხედავად, რასაც ყოველდღიურად ჩვენს ეკრანებზე უკვე ნორმად ქცეულს ვხედავთ, არაფერია ნორმალური ამ შეშლილ დროში და საჭიროა, ამას დავუპირისპირდეთ, სანამ მომავლის რწმენის დაბრუნება შეგვიძლია.”
ალბომი იწყება სიმღერით, რომელიც ეძღვნება რენე მაკლინ გუდს, სამი შვილის 37 წლის დედასა და ამერიკის მოქალაქეს, რომელიც საიმიგრაციო სამსახურმა იანვარში მინეაპოლისში მოკლა.
სიმღერაში Yours Eternally ბენდს ედ შირანი და უკრაინელი ყოფილი ჯარისკაცი და ამჟამად მუსიკოსი ტარა ტოპოლია უერთდება. სიმღერა შთაგონებულია ბონოსა და Edge-ის მოგზაურობით კიევში 2022 წლის გაზაფხულზე, როცა ისინი პირველად შეხვდნენ ტოპოლიას. კომპოზიცია შექმნილია ფრონტზე მებრძოლი ჯარისკაცის წერილის სახით.
აკუსტიკური ბალადა The Tears of Things წარმოადგენს საუბარს მიქელანჯელოს დავითის ქანდაკებასა და მის შემქმნელთან. მას მოსდევს Song of the Future, რომელიც ეძღვნება 16 წლის სარინა ესმაილზადეს – ერთ-ერთ ირანელ სკოლის მოსწავლეს, რომელიც 2022 წელს Woman, Life, Freedom მოძრაობას შეუერთდა.
ალბომი ასევე მოიცავს Wildpeace-ს – ისრაელელი ავტორისა და პოეტის, იუჰუდა ამიჩაის პოემას, რომელსაც ნიგერიელი არტისტი Adeola of Les Amazones d’Afrique ასრულებს. კომპოზიცია One Life at a Time კი სამი შვილის პალესტინელ მამას ეძღვნება, რომელიც 2025 წლის ივლისში საკუთარ სოფელში ისრაელელმა კოლონისტმა მოკლა.
ყველა სიმღერას თან ახლავს ვიდეო ტექსტით. 24 თებერვალს კი – რუსეთის უკრაინაში შეჭრის 4 წლის თავზე – Yours Eternally-ს მოკლემეტრაჟიანი დოკუმენტური ფილმი გამოვა.
ალბომთან ერთად ბენდმა გამოუშვა ჟურნალ Propaganda‘zine-ს ოფიციალური, 40 წლის საიუბილეო გამოცემა, სახელწოდებით U2 Days of Ash: Six Postcards From the Present… Wish We Weren’t There. მინიშნებებით ჯეფრი ეპშტეინის საქმეზე, ჟურნალის სარჩევი, ეპშტეინის ფაილების მსგავსად, უხეშადაა რედაქტირებული.
ბენდის განცხადებით, ადამიანის უფლებებისა და თავისუფლებისთვის გაკეთებული ყველა შემოწირულობა Amnesty International-ს, ჟურნალისტთა დაცვის კომიტეტსა და გაეროს დევნილთა სააგენტოს გადაერიცხება.
მოუსმინეთ ალბომს Days of Ash below:
