არტისტების პროექტებს შორის პაუზები ბუნებრივად ჩნდება, თუმცა ჰილარი დაფის ახალი ალბომისთვის ლოდინი ათ წელზე მეტხანს გაგრძელდა და საბოლოოდ Luck… or Something-ის გამოსვლით დასრულდა.
ახალი ჩანაწერი მომღერლის მეექვსე სტუდიური ალბომი და პირველი ნამუშევარია Atlantic Records-თან თანამშრომლობით. პროექტი 11 სიმღერას მოიცავს, მათ შორის უკვე გამოცემულ Mature-სა და Roommates-ს. როგორც ამბობენ, ალბომი დედობრივი გრძნობით, ქორწინებით და საკუთარი თავის აღმოჩენით არის შთაგონებული.
ჰილარი დაფი აღნიშნავს: „მუდმივად არსებობს კითხვა – შეუძლიათ თუ არა ქალებს, ყველაფერს ერთდროულად გაუმკლავდნენ. ამ პროცესში მივხვდი, რომ ზოგიერთი რამ უნდა დამეთმო, რათა პრიორიტეტი ალბომზე მუშაობა ყოფილიყო. რაც არ უნდა რთული იყოს, მაინც მჯერა, რომ ზოგჯერ საკუთარი თავის არჩევა და იმის კეთება, რაც ძალიან გაშინებს, სრულიად ნორმალურია. ამდენი წლის შემდეგ ალბომის შესაქმნელად დროის გამოყოფა ჩემთვის წარმოუდგენლად დიდი ძალის მომცემი აღმოჩნდა და ახლა მოუთმენლად ველი მსოფლიოსთვის მის გაზიარებას.“
მრავალგზის პლატინის მფლობელმა მომღერალმა, მსახიობმა და სიმღერების თანაავტორმა ახალი ჩანაწერი მისი მეუღლის, მათეო კომას (Britney Spears, P!nk) და ბრაიან ფილიპსის (Alec Benjamin, blink-182) პროდიუსერობით შექმნა. თავად ალბომი ჰილარი დაფის ცხოვრების ერთგვარი ანარეკლია.
„მუდმივად მეკითხებიან, როგორ შევინარჩუნე საღი აზრი ამ ინდუსტრიაში გაზრდის შემდეგ,“ – ამბობს ჰილარი დაფი ახალი პროექტის შესახებ. „ალბომის სათაური ამ კითხვაზე საუკეთესო პასუხია. ის ნათლად აჩვენებს იმას, თუ სად მოვედი და რა გზის გავლა მომიწია.”
ჰილარი დაფი ალბომის მხარდასაჭერად თითქმის ორი ათწლეულის შემდეგ, პირველად გამართავს სრულმასშტაბიან მსოფლიო ტურნეს. კონცერტები აშშ-ში, კანადაში, მექსიკაში, დიდ ბრიტანეთში, ირლანდიაში, ავსტრალიასა და ახალ ზელანდიაში გაიმართება. ტურნე 21-22 ივნისს ფლორიდაში, ვესტ პალმ ბიჩში, ორი კონცერტით დაიწყება და 2027 წლის თებერვლამდე გაგრძელდება. დამატებითი ინფორმაციისთვის ეწვიეთ ბმულს: https://www.hilaryduff.com/live
ამჟამად ჰილარი დაფს Billboard 200-ის ჩარტში ზედიზედ ხუთი ტოპ 10 ჰიტი აქვს, მათ შორის ორი ლიდერი: 2003 წლის Metamorphosis და 2005 წლის Most Wanted. კარიერის განმავლობაში Billboard Hot 100-ის ჩარტში მისი შვიდი სიმღერა მოხვდა.
მოუსმინეთ Luck… or Something-ს:
