„თავს დაღალატებულად ვგრძნობ, განსაკუთრებით მამაჩემის შემთხვევაში… ახლა, როცა უკვე მამაკაცი ვარ და როცა ვცდილობდით კავშირის დამყარებას, როგორც კაცები… ძალიან აღტაცებული ვიყავი იმ მომავლით, რომელიც წინ გვქონდა.”
ეს ერთ-ერთი ემოციური მომენტია, რომელსაც დი’ანჯელოს ვაჟი მაიკლ არჩერი ABC News-ის სპეაციალურ გამოშვებაში Love & Neo-Soul: Honoring D’Angelo აზიარებს. გადაცემა ეთერში 19 თებერვალს გავიდა. ეს არჩერის პირველი ინტერვიუა გრემის მფლობელი მამისა და გრემის ნომინანტი დედის, ენჯი სტოუნის გარდაცვალების შემდეგ.
ექსკლუზიურ ვიდეოში, რომელიც „ბილბორდზეა” ხელმისაწვდომი, არჩერი ამბობს, რომ მამის ავადმყოფობის შესახებ გასული წლის ზაფხულში გაიგო. ოქტომბერში კი დი’ანჯელო პანკრეასის სიმსივნესთან ბრძოლაში დამარცხდა. „ხმა ძალიან დასუსტებული ჰქონდა, მაგრამ მაინც ცდილობდა ჩემთან საუბარს,” – იხსენებს არჩერი იმ პერიოდს, როცა ის ჯერ კიდევ დედის დაკარგვას გლოვობდა, რომელიც 7 თვით ადრე, მარტში, ავტოკატასტროფაში დაიღუპა.
როცა წამყვანი არჩერს სთხოვს, გააზიაროს მისი საყვარელი სიმღერები მშობლების რეპერტუარიდან, ის მხოლოდ ერთს ასახელებს – 1998 წელს, მისი დაბადების შემდეგ შექმნილ სიმღერას, რომელიც შესულია დი’ანჯელოს 2000 წლის ალბომში Voodoo. „დაბეჯითებით Send It On. ეს სიმღერა მან და დედამ ერთად დაწერეს,” – ამბობს არჩერი და აღნიშნავს: „მამამ სამყაროზე თავისი ნაკვალევი დატოვა.”
Love & Neo-Soul: Honoring D’Angelo-ს ABC News-ზე როკსი დიასი უძღვება. არჩერის გარდა, დიასი ესაუბრება გრემის მფლობელ მომღერალს, ავტორსა და მსახიობ ანდრა დეის და პროდიუსერსა და რეპერ D-Nice-ს. ისინი საუბრობენ დი’ანჯელოს პიონერულ როლზე 90-იანების ნეო-სოულის მოძრაობაში. გამოშვებაში ასევე გვხვდება რამდენიმე არტისტის ინტერვიუ, რომელთა შთაგონების წყაროც სწორედ დი’ანჯელო გახდა. მათ შორის არიან არი ლენოქსი, Lucky Daye და Elmiene.
