Radiohead იმედგაცრუებულია მას შემდეგ, რაც გაიგეს, რომ მათი სიმღერა Let Down საიმიგრაციო სამსახურის ვიდეოში იქნა გამოყენებული, რომელიც სოციალურ ქსელში 18 თებერვალს გამოქვეყნდა.
„მოვითხოვთ, რომ საიმიგრაციო სამსახურის სოციალური მედიის ადმინისტრატორებმა ვიდეო წაშალონ,” – წერს ბენდი „ბილბორდთან” გაზიარებულ განცხადებაში. „ეს არ არის სასაცილო. ეს სიმღერა ჩვენთვის და სხვა ადამიანებისთვის ბევრს ნიშნავს და თქვენ მას ვერ მიითვისებთ ბრძოლის გარეშე.”
ვიდეო, რომელმაც სამი გრემის ფლობელი ბენდის უკმაყოფილება გამოიწვია, იწყება შავი ეკრანით, ფონად კი სწორედ Let Down-ის მესამე სტროფი ჟღერს. ამის შემდეგ ეკრანზე ერთმანეთის მიყოლებით ჩნდება ამერიკელების ფოტოები. ვიდეოს აღწერაში ვკითხულობთ: „ამერიკის მოქალაქეები, რომლებიც გააუპატიურეს და მოკლეს მათ, ვისაც ჩვენს ქვეყანაში ყოფნის უფლება არ აქვთ. აი, ვისთვის ვიბრძვით. ეს არის ჩვენი ‘რატომ’”.
Let Down გამოშვებიდან 28 წლის შემდეგ შევიდა Billboard Hot 100-ში. სიმღერამ პირველი პოზიცია დაიკავა 2025 წლის 30 აგვისტოთი დათარიღებულ ჩარტში.
აშშ-ის საიმიგრაციო სამსახურის წინააღმდეგ არაერთი სხვა არტისტიც გამოდის, მათ შორის არიან: ბილი აილიში, ლედი გაგა, Bad Bunny, ჯასტინ ბიბერი, ჩაპელ როუნი, ბრიუს სპრინგსტინი, ტომ მორელო და კეილანი. საიმიგრაციო დეპარტამენტის მიერ რენე გუდისა და ალექს პრეტის მკვლელობის შემდეგ მორელომ მინეაპოლისში საქველმოქმედო კონცერტი გამართა, არა მხოლოდ მათი ოჯახების მხარდასაჭერად, არამედ ტრამპის პოლიტიკის გასაკრიტიკებლად და, მისივე სიტყვებით, დემოკრატიისა და სამართლიანობის დასაცავად. სპრინგსტინმა, რომელიც ასევე ღიად აკრიტიკებს პრეზიდენტს, იანვარში საიმიგრაციო სამსახურის წინააღმდეგ მიმართული სიმღერა Streets of Minneapolis გამოსცა, თებერვალში კი, როგორც თავად განაცხადა, ამერიკის დასაცავად Land of Hope and Dream ტურნე დააანონსა.
