პოლიციის განცხადების მიხედვით, 27 თებერვალს Cher-ის ვაჟი მას შემდეგ დააკავეს, რაც ნიუ ჰემფშირის პრესტიჟულ კერძო სკოლაში აგრესია გამოავლინა. როგორც ცნობილია, მას სასწავლებელთან არავითარი კავშირი არ ჰქონია.
49 წლის ელაიჯა ბლუ ოლმანი მერიმაკის ოლქის საპატიმროში გადაიყვანეს და ბრალი ოთხი სხვადასხვა მუხლით წაუყენეს: ფიზიკური შეურაცხყოფის ორი ეპიზოდი, ტერიტორიაზე უკანონოდ შეჭრა და კრიმინალური მუქარა. ოლმანს ასევე ბრალი ედება საზოგადოებრივი წესრიგის დარღვევაში, რაც შტატის კანონმდებლობით სამართალდარღვევაა, თუმცა სისხლის სამართლის დანაშაულად არ ითვლება.
იმ დღეს, დაახლოებით საღამოს 19:00 საათზე, კონკორდის პოლიციამ მიიღო შეტყობინება, რომ ოლმანი „სენტ-პოლის სკოლის“ (St. Paul’s School) სასადილო დარბაზში მყოფ პირებს აწუხებდა. ბრალის წარდგენის შემდეგ პოლიციამ განაცხადა, რომ ის გირაოს სანაცვლოდ მანამდე გაათავისუფლეს, სანამ მის საქმეს სასამართლოში განიხილავენ.
TMZ-ს წყაროს ინფორმაციით, ოლმანი სამხრეთ კალიფორნიაში ცხოვრობს და სკოლასთან კავშირი არ აქვს, ამიტომ გაურკვეველია, რატომ იმყოფებოდა იქ.
სასამართლო ჩანაწერებში ოლმანის ადვოკატის შესახებ ინფორმაცია არ მოიპოვება.
Cher-ის წარმომადგენელთან დაკავშირება ოპერატიულად ვერ მოხერხდა. „სენტ-პოლის სკოლამ“ კი კომენტარზე უარი განაცხადა.
2025 წლის ივნისში ელაიჯა ბლუ ოლმანი საკუთარ სახლში ზედოზირების გამო კლინიკაში გადაიყვანეს. TMZ-ის ინფორმაციით, მოგვიანებით საცხოვრებელ სახლში ნარკოტიკული ნივთიერებები აღმოაჩინეს. ინციდენტი დაახლოებით ორი თვის შემდეგ მოხდა, რაც მისმა მეუღლემ, მარიენჯელა კინგმა 13-წლიანი ქორწინების შემდეგ განქორწინებაზე შეიტანა მოთხოვნა.
2023 წელს Cher-მა სასამართლოს შვილის მეურვეობის მოთხოვნით მიმართა და განაცხადა, რომ ის „არსებითად ვერ ახერხებდა საკუთარი ფინანსური რესურსების მართვას მძიმე ფსიქიკური ჯანმრთელობის და ნარკოტიკულ ნივთიერებებზე დამოკიდებულების გამო“. TMZ-ის ინფორმაციით, მან მარიენჯელა კინგი დაადანაშაულა იმაშიც, რომ იგი ხელს უშლიდა მისი შვილის მკურნალობის მცდელობებს. საქმე 2024 წლის ბოლოს შეწყდა.
