BRIT Awards 2026-ის გამარჯვებულები ცნობილია. 28 თებერვალს მანჩესტერში გამართულ BRIT Awards-ზე მთავარი ვარსკვლავი ოლივია დინი გახდა – მან ოთხი ჯილდო მოიგო. დინმა გაიმარჯვა ნომინაციებში: „წლის ალბომი“, „წლის არტისტი“ და „წლის პოპშემსრულებელი“. გარდა ამისა, სემ ფენდერთან ერთად ჩაწერილმა სიმღერამ – Rein Me In – წლის საუკეთესო სიმღერის ტიტული მოიპოვა. საინტერესოა, რომ ამ კატეგორიაში ოლივია ორი სიმღერით იყო წარდგენილი. მიუხედავად ასეთი წარმატებისა, ერთ ღამეში მოპოვებული ჯილდოების რაოდენობით რეკორდსმენად კვლავ RAYE რჩება – არტისტმა 2024 წელს 6 ჯილდო მოიპოვა.
წელს დაჯილდოების ცერემონია ისტორიაში პირველად გაიმართა ლონდონის გარეთ – მანჩესტერის Co-op Live არენაზე. საღამოს წამყვანი, უკვე მეექვსედ, კომიკოსი ჯეკ უაითჰოლი იყო, სცენაზე კი ოლივია დინი, ჰარი სტაილსი, Wolf Alice და სხვა შემსრულებლები გამოჩნდნენ.
ოლივია დინის მეორე ალბომი – The Art of Loving წლის საუკეთესო ალბომად დასახელდა. ამით გაგრძელდა ბოლო წლების ტენდენცია, როცა წლის არტისტისა და წლის ალბომის ნომინაციებში ერთი და იგივე პირი იმარჯვებს. სხვადასხვა წელს ამ ორ კატეგორიებში გამარჯვებულებად დასახელდნენ: ადელი, ჰარი სტაილსი, RAYE და Charli xcx.
სემ ფენდერმა კვლავ დაიმსახურა საუკეთესო ალტერნატიული/როკ შემსრულებლის წოდება. ეს ამ კატეგორიაში ბოლო ხუთი წლის განმავლობაში მისი მესამე გამარჯვებაა. Lola Young-მა წლის აღმოჩენის ნომინაციაში გაიმარჯვა, Wolf Alice კი კარიერაში მეორედ დასახელდა წლის საუკეთესო ჯგუფად.
Rosalía გახდა პირველი ესპანურენოვანი არტისტი, რომელმაც „წლის საერთაშორისო არტისტის“ ნომინაციაში გაიმარჯვა. მან უკან ჩამოიტოვა ტეილორ სვიფტი და ლედი გაგა. ხოლო Rosé-მ, ბრუნო მარსთან ერთად ჩაწერილი სიმღერით – APT – BRIT Awards-ის ისტორიაში პირველი გამარჯვება მოუტანა K-pop-ის ჟანრს.
BRIT Awards-ზე საპატიო ჯილდოების მფლობელებიც გამოვლინდნენ. განსაკუთრებული პატივი მიაგეს ინდუსტრიის ვეტერანებს: ნოელ გალაგერს, რომელმაც წლის სიმღერების ავტორის კატეგორიაში გაიმარჯვა; მარკ რონსონს, რომელიც მუსიკაში შეტანილი განსაკუთრებული წვლილისთვის დაჯილდოვდა; ოზი ოსბორნს გარდაცვალების შემდეგ მიენიჭა ჯილდო მუსიკალური მემკვიდრეობისთვის. მის პატივსაცემად სპეციალური ნომერი რობი უილიამსმა შეასრულა.
ცერემონიაზე ასევე გაიხსენეს გარდაცვლილი მუსიკოსები, მათ შორის მანჩესტერის სიმბოლო – The Stone Roses-ის ბასისტი გარი „მანი“ მაუნფილდი, რომელიც 2025 წლის ნოემბერში გარდაიცვალა.
გამარჯვებულთა უმეტესობა სპეციალურმა ჟიურიმ გამოავლინა, თუმცა წლის საუკეთესო ბრიტანული და საერთაშორისო სიმღერების ბედი ფანებმა გადაწყვიტეს.
გაეცანით 2026 წლის BRIT Awards-ის გამარჯვებულების სრულ სიას.
