6 მარტს ჯგუფმა Dogstar, რომლის შემადგენლობაშიც არიან კიანუ რივზი (ბასი), ბრეტ დომროუზი (გიტარა,ვოკალი) და რობერტ მეილჰაუსი (დრამი), მეოთხე სტუდიური ალბომი – All in Now დააანონსა. ალბომი 29 მაისს ბენდის საკუთარ ლეიბლზე, Dillon Street Records-ზე გამოიცემა.
„პირადად მე ეს ყველაფერი ძალიან მომეწონა. ჩემი განწყობა ასეთი იყო: მოდით, ბევრი ვიშრომოთ და ეს გავაკეთოთ,” – თქვა რივზმა ჯგუფის სტუდიაში დაბრუნებასთან დაკავშირებით. მეილჰაუსმა კი დაამატა: „ეს ალბომი ნამდვილად გადმოსცემს იმ ენერგიას, რომელიც ჩვენი ჯგუფის გულშია და იმ სიხარულს, რომელსაც ერთად დაკვრისას ყოველთვის ვგრძნობდით“.
ალბომის გამოსვლამდე Dogstar-მა მუსიკალური კლიპიც წარადგინა, რომელიც გადაღებულია სიმღერაზე – All in Now. ბენდმა 25-დღიანი ტურნეც დააანონსა.
„All In Now პირდაპირ თავში გირტყამს,“ – თქვა მეილჰაუსმა სიმღერის შესახებ. „ნამდვილი საკონცერტო სიმღერაა. სათაურიც კიანუმ მოიფიქრა და ის ზუსტად გამოხატავს იმას, თუ სად ვართ და ვინ ვართ დღეს, როგორც ბენდი.“
Dogstar-ის ახალი ალბომის პროდიუსერი ნიკ ლონეია. წინა ალბომი კი ჯგუფმა 2023 წელს გამოუშვა და მისი სახელწოდებაა Somewhere Between the Power Lines. იქამდე ბენდს ორი ათწლელულის განმავლობაში შემოქმედებითი პაუზა ჰქონდა.
რაც შეეხება Dogstar-ის ტურნეს, ის 28 მაისს ჰაილენდში დაიწყება. კალიფორნიაში კიდევ ერთი კონცერტის შემდეგ, ჯგუფი გაერთიანებულ სამეფოსა და ევროპას ეწვევა, სადაც ივლისის ბოლომდე დარჩება.
ჯგუფის ამერიკული ტურნე 1-ელ აგვისტოს ოსტინში განახლდება. ბენდი ეწვევა ატლანტას, ნეშვილს, ფილადელფიას, ბოსტონს, ნიუ-იორკსა და დენვერს, ხოლო ტურნეს 3 სექტემბერს სალტ ლეიკ სიტიში დაასრულებენ.
Dogstar-ის ახალი ალბომის ანონსისა და ტურნეს თარიღების ნახვა მათ ინსტაგრამ გვერდზე შეგიძლიათ.
