8 მარტს თბილისის ცნობილ მუსიკალურ სივრცეში – Jazz Club 1984-ში გერმანიაში მცხოვრები ქართველი მომღერლის, ნათია თოდუას კონცერტი გაიმართა. საღამო განსაკუთრებული აღმოჩნდა როგორც თავად არტისტისთვის, ისე ქართველი მსმენელისთვის, რადგან მომღერალი პირველად წარდგა თბილისში საკუთარი ბენდის სრული შემადგენლობით: (ნათია თოდუა – ვოკალი, კლაუდიო კონსოლი – გიტარა, ანტონიო ფოპრნიტო – ბასი, სებასტიან როსალესი – დრამი). მუსიკოსები სპეციალურად კონცერტისთვის ბერლინიდან ჩამოვიდნენ, რაც საღამოს კიდევ უფრო მეტ ემოციურ ელფერს სძენდა.
საღამოს პროგრამა მრავალფეროვანი იყო: შესრულდა როგორც ნათია თოდუას საავტორო კომპოზიციები, ისე მსოფლიო მუსიკის ცნობილი ჰიტების ინტერპრეტაციები. თითოეულმა სიმღერამ განსხვავებული განწყობა შექმნა, არტისტის ძლიერი ვოკალისა და ბენდის ცოცხალი შესრულების სინთეზი აუდიტორიისთვის განსაკუთრებულ მუსიკალურ გამოცდილებად იქცა.
მომღერლისთვის ამ საღამოს განსაკუთრებული მნიშვნელობა ჰქონდა, რადგან თბილისის სცენაზე საკუთარი ბენდის წარდგენა მისი დიდი ხნის სურვილი იყო. სწორედ ამიტომ გადაწყვიტა, რომ ქართველი მსმენელისთვის ეჩვენებინა ის მუსიკალური გარემო, რომელშიც იგი ბოლო წლებში ბერლინში მუშაობს.
„ამ საღამოსთვის პირველად ჩამომყავს ჩემი ბენდი ბერლინიდან და ჩემთვის ძალიან მნიშვნელოვანია, რომ ეს მუსიკალური გამოცდილება ქართველ მსმენელს გავუზიარო“ – ამბობს ნათია თოდუა Billboard საქართველოსთან საუბარში.
ნათია თოდუასა და მისი ბერლინური ბენდის თბილისურმა დებიუტმა Jazz Club 1984-ში სრულიად განსხვავებული ატმოსფერო შექმნა. უნიკალურმა გარემომ და დახვეწილმა შესრულებამ კი შექმნა განწყობა, რომელიც თითოეულ მსმენელს დიდხანს გაჰყვება.
