Artificial Love სერგი გვარჯალაძის საკულტო სიმღერაა, რომელიც 90-იანებში შეიქმნა. უკანასკნელ წლებში კი ხელახლა ამოტივტივდა და განსაკუთრებული პოპულარობა მოიპოვა.
12 მარტს მუსიკოსმა სიმღერის ახალი ვერსია და მასზე შექმნილი ვიდეოკლიპი გამოსცა – კომპოზიციის ხელახალი გააზრება, რაც მას თანამედროვე ციფრულ და ფუტურისტულ კონტექსტს სძენს.
პროექტი ეფუძნება Faketivism-ის მანიფესტს, რომელსაც სერგი გვარჯალაძე თავის ციფრულ ორეულთან, Synth Etique-თან ერთად ქმნის და რომელიც ხელოვნურსა და ნამდვილს შორის არსებულ ზღვარს შლის. კლიპის გმირის ვიზუალურ პროტოტიპად სერგიმ მეუღლის, ჟურნალისტ ანა აბაკელიას სახე გამოიყენა, რაც სწორედ ამ კავშირს უსვამს ხაზს და Faketivism-ის ფილოსოფიას კიდევ უფრო პირადულსა და მრავლშრიანს ხდის. თავად ვიდეო კი, ფუტურისტული კლიშეებითა და ირონიული ხედვით, ჩვენი მომავლის შესაძლო სცენარებს გვიჩვენებს.
ავტორის განმარტებით, Faketivism პანკენერგიისა და სტენსილ-გრაფიტის პრინციპების ნაზავია, სადაც ძველი კონტექსტის შეცვლა ახალ კონცეფციას ქმნის.
პროექტის მიზანია ტექნოლოგიების დახმარებით ემოციური კავშირების ძიება და „ხელოვნური მარტოობის“ შევსება.
კლიპი komuna.ge-ზე გამოქვეყნდა, რომელიც მულტიჟანრული Youtube ვიდეო ეკოსისტემაა. მისი ნაწილია ასევე „სუბტროპიკა” – 70-იანების არარსებული ბენდის ისტორია, რომელიც მიზნად ისახავს გართობას, ემოციების გამოწვევას, ცნობისმოყვარეობის გაღვივებასა და ახალი კავშირების შექმნას, სადაც ტექნოლოგია მარტოობის შემავსებლის როლსაც ასრულებს.
Sergi feat. Synth Etique – “Artificial Love” Leno Records-მა გამოსცა და ხელმისაწვდომია ყველა სტრიმინგ სერვისზე.
