ლუდვიგ გორანსონმა ოსკარის ჯილდო დაიმსახურა საუკეთესო საუნდტრეკის ნომინაციაში ფილმისთვის Sinners. შვედი კომპოზიტორი პირველი ადამიანია 21-ე საუკუნეში, რომელმაც ამ კატეგორიაში გამარჯვება სამჯერ მოიპოვა. მანამდე მას ოსკარი გადაეცა ფილმებისთვის: Black Panther (2019 წელს) და Oppenheimer (2024 წელს).
მადლობის სიტყვაში კომპოზიტორმა გაიხსენა, თუ როგორ დაიწყო მისი მუსიკალური კარიერი გზა. „1964 წელს მამაჩემმა შვედეთში თავისი პირველი ბლუზის ალბომი იყიდა. ეს იყო ჯონ ლი ჰუკერის ალბომი. მისი მუსიკა ისეთი ძლიერი იყო, რომ მამაჩემის ცხოვრება შეცვალა და მან თავისი თავი მთლიანად მუსიკას მიუძღვნა,” – თქვა გორანსონმა. „როცა 7 წლის ვიყავი, ხელში გიტარა დავიჭირე… სწორედ გიტარა იყო ის ინსტრუმენტი, რომელმაც ბევრი კარი გამიხსნა… ჩამომიყვანა შტატებში და მიმიყვანა ჩვენი თაობის ერთ-ერთ უდიდეს ამბის მთხრობელთან – რაიან კუგლერთან. რაიან, მადლობა შენი ხედვისთვის. მადლობა ისეთი ფილმის შექმნისთვის, რომელთანაც მთელმა მსოფლიომ იპოვა კავშირი.”
სწორედ კუგლერია Sinners-ის, ისევე, როგორც Black Panther-ის რეჟისორი. გორანსონი ასევე პირველი კომპოზიტორია, რომელმაც ორჯერ მოიგო საუკეთესო საუნდტრეკის ნომინაცია ერთსა და იმავე რეჟისორთან თანამშრომლობისთვის. პირველი ჰოვარდ შორია, რომელიც ოსკარის მფლობელი გახდა ფილმებისთვის: The Lord of the Rings: The Fellowship of the Ring (2022 წელი) და The Lord of the Rings: The Return of the King (2004 წელი). ორივეს რეჟისორი პიტერ ჯეკსონია.
ოსკარის ჯილდომდე Sinners-ის საუნდტრეკს მოგებული აქვს Critics Choice Awards, ოქროს გლობუსი და გრემი. რაც შეეხება ოსკარის ნომინაციას, აქ გორანსონის მეტოქეები იყვნენ: ჯერსკინ ფენდრიქსი ფილმისთვის Bugonia, ალექსანდრ დესპლა ფილმისთვის „ფრანკენშტაინი”, მაქს რიხტერი ფილმისთვის Hamnet და ჯონი გრინვუდი ფილმისთვის One Battle After Another.
გორანსონის წლევანდელი დომინაციის ნიშანია ისიც, რომ ის ერთადერთი კომპოზიტორი იყო, რომელიც ორ ნომინაციაში – საუკეთესო საუნდტრეკი და საუკეთესო ორიგინალური სიმღერა – იყო წარდგენილი. ეს პირველი შემთხვევაა თავად გორანსონისთვისაც, როცა ერთსა და იმავე წელს ორივე კატეგორიაში იქნა დასახელებული.
