გიორგი ქინქლაძე სოციალურ ქსელში ნოელ გალაგერთან ერთად გადაღებულ ფოტოს აქვეყნებს. როგორც პოსტის აღწერაში ვკითხულობთ, ფოტო მანჩესტერ სიტისა და არსენალის თამაშის დღესაა გადაღებული (19 აპრილი), რომელიც სიტის სასარგებლოდ 2:1 დასრულდა.
„არსენალზე გამარჯვება რამდენიმე დღის შემდეგაც საოცარ გრძნობას იწვევს. ასეთი თამაშები აჩვენებს ხასიათს და იმას, თუ რას ნიშნავს ეს დიდებული კლუბი. მიხარია, რომ ეს მომენტი ჩემს ძველ მეგობართან, ნოელ გალაგერთან ერთად გავიზიარე. ფეხბურთი, მუსიკა და მანჩესტერი – ისე, როგორც უნდა იყოს. სიტი სიკვდილამდე,” – წერს ქართველი ფეხბურთელი. ფოტოს კი ფონად გასდევს „ოაზისის” სიმღერა Don’t Look Back in Anger.
შეგახსენებთ, რომ გიორგი ქინქლაძე 1995-1998 წლებში მანჩესტერ სიტიში თამაშობდა, მანჩესტერში დაბადებული ნოელ გალაგერი კი პრემიერ ლიგის ათგზის ჩემპიონი კლუბის ცნობილი ფანია. მათი მეგობრობაც ამ გადაკვეთის წყალობით დაიწყო. ქინქლაძის სადებიუტო მატჩის შემდეგ ტოტენჰემის წინააღმდეგ, „ოაზისის” სოლისტმა ქართველ ფეხბურთელზე კომენტარი გააკეთა: „ეს ყველაზე საშიში ან ყველაზე კარგი რამაა, რაც კი ოდესმე მინახავს.”
ფანებმა კი სიტის ჰიმნად აღიარებული „ოაზისის” ყველაზე დიდი ჰიტი-ს, Wonderwall-ის ტექსტი გიორგი ქინქლაძეზე გადააკეთეს, რომელსაც მეტსახელად Kinky-ს ეძახდნენ:
All the runs that Kinky makes are winding.
And all the goals that City score are blinding.
