2026 წლის FIFA-ს მსოფლიო ჩემპიონატმა გახსნის ცერემონიებისთვის ვარსკვლავური შემადგენლობა დააანონსა. კეტი პერი, Future, ტაილა, LISA და ანიტა იმ მუსიკოსებს შორის არიან, რომლებიც აშშ-ში, კანადასა და მექსიკაში დაგეგმილ გახსნის ღონისძიებებზე გამოვლენ. ინფორმაცია პირველად The New York Times-ის გამოცემა The Athletic-მა გაავრცელა.
კეტი პერი ლოს-ანჯელესში დაგეგმილი გახსნის ცერემონიის მთავარი ვარსკვლავი იქნება. ღონისძიება 12 ივნისს, აშშ-ის ნაკრებისა და პარაგვაის მატჩამდე გაიმართება. SoFi Stadium-ის სცენაზე ასევე გამოვლენ რეპერი Future და DJ Sanjoy.
12 ივნისს ტორონტოში, სადაც კანადა ბოსნია-ჰერცეგოვინას დაუპირისპირდება, მაიკლ ბუბლე ალესია კარასა და ალანის მორისეტთან ერთად იმღერებს.
The Athletic-მა დაასახელა სხვა კანადელი შემსრულებლებიც, რომლებიც საფეხბურთო დღესასწაულის ნაწილი იქნებიან, თუმცა მათი გამოსვლა უშუალოდ 12 ივნისის მატჩს არ უკავშირდება. მათ შორის არიან ჯესი რეიესი, ნორა ფატეჰი და უილიამ პრინცი.
11 ივნისს მექსიკა სამხრეთ აფრიკის წინააღმდეგ მსოფლიო ჩემპიონატს გახსნის. ამ დღეს Azteca Stadium-ზე შეკრებილი გულშემატკივრების წინაშე როკჯგუფი Maná, ტაილა და Los Ángeles Azules წარდგებიან.
გახსნის ცერემონიების ფარგლებში მსოფლიოს სხვადასხვა წერტილში კიდევ არაერთი არტისტი გამოჩნდება, მათ შორის: ჯეი ბალვინი, დენი ოუშენი, Elyanna და მარილინა ბოგადო.
FIFA-ს ჯერ არ გამოუცხადებია, ვინ მიიღებს მონაწილეობას ფინალური მატჩის ტაიმებს შორის შოუზე, რომელიც 19 ივლისს ნიუ-ჯერსიში, MetLife Stadium-ზე გაიმართება.
გარდა ამისა, მზადდება მსოფლიო ჩემპიონატის ოფიციალური ალბომიც. შაკირამ უკვე დააანონსა Burna Boy-სთან კოლაბორაცია, სახელწოდებით Dai Dai, რომლის მუსიკალური კლიპიც 14 მაისს გამოვა.
