პროექტი Modular Friends მოდულარული სინთეზის გარშემო შეკრებილ მუსიკოსებს, აუდიო-რეაქტიული ვიზუალური ხელოვნების წარმომადგენლებსა და ექსპერიმენტული კოლაბორაციების მოყვარულ არტისტებს აერთიანებს. ეს არის ცოცხალი შესრულება, იმპროვიზაცია და უნიკალური მუსიკალური კომპოზიციები, რომელიც არასოდეს განმეორდება, რაც საბოლოო ჯამში განსაკუთრებულ ღირებულებას ანიჭებს ფორმატს.
საღამოს ფარგლებში მსმენელის წინაშე წარდგებიან არტისტები: Neroli Kid / Giga Baindurashvili, William Tavadze, Lado Barnovi, Vaska, TeTe / Tetso / Vazha Marr, Masa Trippin / Shota / Wrong Fingers, AGAVA / Wayward Atom / Spilled Ambiences და Eddie Strxm. Jam Session-ს კი Marching Dog და Tamarma შეუერთდებიან.
ღონისძიების მნიშვნელოვანი ნაწილი იქნება აუდიო-რეაქტიული ვიზუალური ხელოვნებაც, რომელზეც Skywalker, TusY, Progenol და Nenealism/ Jamanita/ Yoyo, She nocturne / Sophie Gvelkuashvili იმუშავებენ.
„სინთეზისა და კოლექტიური მუსიკალური ხედვის გაზიარებასთან ერთად, ყველას გვაერთიანებს ცხოვრების წესი და გულწრფელი სურვილი, მოვახდინოთ მოდულარული მუსიკის პოპულარიზაცია და შევქმნათ ახალი გადაკვეთის წერტილები მუსიკოსებისა და სხვადასხვა მიმართულების არტისტებისთვის.
ბუნებასთან დიალოგი ჩვენთვის შთაგონების წყაროცაა, თავისუფლების გამოხატვის ფორმაც, ახლის შემეცნებაც და სიმშვიდეც. ამავდროულად, მნიშვნელოვანია დღის აქტივობების პოპულარიზაცია და ხელოვნების სფეროში მსგავსი ხედვის მქონე არტისტებთან, სივრცეებსა და სტრუქტურებთან თანაარსებობა. თუმცა ყველაზე მთავარი მაინც ახალი ადამიანების გაცნობა, მეგობრობა და გამოცდილებების გაზიარებაა.“ – ლევან შანშაიაშვილი – მუსიკოსი.
ღონისძიება, სახელწოდებით Modular Friends 011 15:00 საათზე Synthesia Lab-ში დაიწყება, ბილეთების შეძენა კი შესაძლებელი იქნება მხოლოდ ინსტაგრამის პირადი შეტყობინების საშუალებით.
აღსანიშნავია, რომ Synthesia Lab წარმოადგენს კრეატიულ პლატფორმას, რომელიც ბგერის, ვიზუალური ხელოვნებისა და თანამედროვე ტექნოლოგიების გადაკვეთის წერტილებს იკვლევს. ლაბორატორიის საქმიანობის ძირითადი მიმართულება ელექტრონული მუსიკა, მულტიმედიური ხელოვნება და ციფრული ექსპერიმენტებია.
