ლორინ ჰილი ახლა უკვე პირდაპირ საუბრობს, თუ რატომ აღარ გამოსცა ახალი ალბომი 1998 წლის The Miseducation of Lauryn Hill-ის შემდეგ.
14 მაისს Fraim World-მა ინსტაგრამზე პოსტი გამოაქვეყნა, სადაც ჩამოთვლილი იყო შესაძლო მიზეზები, რის გამოც მომღერალმა გადაწყვიტა, ახალი ჩანაწერი აღარ გამოეცა. მათ შორის იყო პრობლემები ლეიბლთან, პოპულარობასთან დაკავშირებული წნეხი და მომღერლის პერფექციონიზმი.
ცოტა ხანში კი კომენტარების ველში თავად გრემის მფლობელი არტისტი გამოჩნდა. მან დაწერა, რომ პოსტში გამოთქმულ ვარაუდებს არ ეთანხმებოდა და დეტალურად ახსნა, თუ რატომ აიღო ათწლეულოვანი პაუზა Miseducation-იდან დღემდე.
„როცა შთაგონებული ხარ და განზრახული გაქვს, იყო პრინციპული, საკმარისად არავინ საუბრობს გამოფიტვაზე… არც იმ გამოწვევაზე, იპოვო უსაფრთხო გარემო, სადაც შეძლებ შემოქმედებას. ადამიანების უმრავლესობა შესაძლებლობებს მხოლოდ დოლარებში ხედავს და ხშირად გამორიცხავს შინაგან გრძნობას.”
„არც The Score და არც Miseducation არ შექმნილა იმის გამო, რომ ამის უფლება მოგვცეს – ჩვენ ყოველი ნაბიჯისთვის ბრძოლა გვიწევდა. მოზღვავებულმა წარმატებამ შეიძლება სიხარბე გამოიწვიოს, რომელიც ხელოვნებას ფულის სანაცვლოდ აუფასურებს. ჩვენ ამ ყველაფრის გავლა გვიწევს. არტისტები სხვადასხვა ეტაპს გადიან. შემოქმედებითობა მოითხოვს გამოხატვას, აღმოჩენებსა და ექსპერიმენტებს. არსებობდნენ ადამიანები, რომელთაც სძულდათ Unplugged, მაგრამ დღეს ზოგიერთი მათგანი მისი მნიშვნელობის დამცველია.”
50 წლის მომღერალმა საკუთარი თავი აბოლიციონისტ ჰარიეტ ტაბმენს შეადარა იმაზე საუბრისას, რომ მას არ ჰქონდა საკუთარი სიმართლის სრულად გამოხატვის ძალაუფლება და მისი შემოქმედების თავისუფლება შეზღუდული იყო.
„რაღაც მხრივ, ჰარიეტ ტაბმენის მსგავსი ფიგურა ვიყავი, რომელიც გარბოდა, რომ ძალაუფლებაში მყოფთათვის მწარე სიმართლე ეთქვა, სანამ გარკვეული ძალები ამ კარებს არ დახურავდნენ. თუ ეს ასეთ მარტივი იყო, სად არის დღეს ეს გამოხატვა მსოფლიო სცენაზე? სისტემებს ეშინიათ იმის, რასაც ვერ აკონტროლებენ. შემოქმედებითობა კი ყველაზე ძლიერი მაშინაა, როცა თავისუფალია. სხვა თუ არაფერი გამიკეთებია, სტანდარტები და შესაძლებლობები გავაცანი თაობას, რომელმაც მანამდე არ იცოდა, რომ ამ დონეზე შეეძლო შემოქმედების აყვანა.”
„ხშირად სისტემის მხარდაჭერის მიღმა ისეთ რაღაცებს ვაკეთებ, ადამიანები გააზრებასაც ვერ ასწრებენ, თუ რა გავაკეთე. სხვა არტისტი კი, რომელიც აფასებს შთაგონებას, დაინახავს მის ღირებულებას და თავიდან წარუდგენს აუდიტორიას, რომელიც უკვე მზადაა მის მისაღებად.”
The Miseducation of Lauryn Hill 1998 წელს გამოვიდა და პირველსავე კვირაში 422 000 ერთეულის გაყიდვით Billboard 200-ის ლიდერი გახდა. ჩანაწერმა მოიგო გრემის ჯილდო წლის ალბომის ნომინაციაში, რითაც ჰილი პირველი რეპერი გახდა, რომელმაც ეს შეძლო. მისმა სიმღერამ Doo Wop (That Thing) კი Billboard Hot 100-ის ლიდერობა მოიპოვა.
6 ივნისს ლორინ ჰილი Fugees-ის თანადამფუძნებელ უაიკლიფ ჯენს შეუერთდება Global Citizen Live: Rio De Janeiroin Brazil კონცერტზე, რომელიც ჯგუფის ალბომის, The Score-ის 30 წლის იუბილეს ეძღვნება.
