ქართველმა მუსიკოსმა და პროდიუსერმა Melqo-მ მსმენელს ახალი ნამუშევარი წარუდგინა. 17 მაისს არტისტმა სიმღერა, სახელწოდებით Crysis Crysis და მასზე გადაღებული კონცეპტუალური ვიდეოკლიპი გამოუშვა, რომელიც მუსიკალურ პლატფორმებზე უკვე ხელმისაწვდომია.
ტრეკის ავტორი და პროდიუსერი თავად Melqo-ა, ვიდეოკლიპზე კი თინათინ ვალიშვილიმა და მარიამ კაჭარავამ იმუშავეს. პროექტის პროდაქშენი Tv Breakers-ს ეკუთვნის.
არტისტის თქმით, Crysis Crysis შემოქმედებითი ციკლის ნაწილია და მისი შექმნის პროცესი მეგობრულ კოლაბორაციად იქცა. მუსიკოსი ნამუშევრის ტექნიკურ მხარესა და გადასაღებ მოედანზე არსებულ ატმოსფეროს იხსენებს:
„ტრეკი Crysis Crysis არის ახალი Vantabliss EP-ის ექვსი ტრეკიდან ერთ-ერთი. იგი საქართველოში დაარსებული კომპიუტერული თამაშების კომპანიის, Half-Sword Games-ის სტუდიაში ჩაიწერა, რომლის დამფუძნებელმა ფრანჩესკო ტოგონიძემ კლიპში ერთ-ერთი წამყვანი როლი ითამაშა. თვითონ კლიპი Tv Breakers-ის დამაარსებელთან, მარიამ კაჭარავასთან და თინათინ ვალიშვილთან ერთად დავგეგმეთ. მოვიწვიეთ რამდენიმე უნიჭიერესი მეგობარი და ძალიან ორგანიზებულად, ოპერატიულად გადავიღეთ. გაოგნებული ვარ, როგორ შეძლო ხუთკაციანმა გუნდმა სულ რამდენიმე დღეში ასეთი გემოვნებიანი, რეჟისორულ-სტილისტურად მდიდარი და ხარისხიანი ნამუშევრის შექმნა თან ასე მხიარულად და ჰაეროვნად.“ – Melqo.
ბოლო პერიოდში Melqo საცხოვრებლად იაპონიაში გადავიდა, რაც მის შემოქმედებაზეც აისახა. არტისტი აღნიშნავს, რომ ახალი ვიდეოკლიპი მის პირად გამოცდილებებსა და შინაგან ტრანსფორმაციას ეხმიანება:
„კლიპის სიუჟეტი ჩემს ცხოვრებაში მიმდინარე მოვლენებს ეხმაურება – მეოჯახეობა, გამოფხიზლება, ბოლო დროს საკუთარი თავის, წარსულისა და გარემოს გადააზრებისას აღმოცენებული აზრობრივი მიმართულებების, ახალი ფენებისა და ინფორმაციული განზომილებების ძიება და აღმოჩენა. თვალახვეული რაინდი ასახავს ჩემს ეგოს, რომელიც გარედან ერთი შეხედვით მძიმე და შემზარავი ფოლადის აბჯრითაა შემოსილი, შიგნიდან კი უმანკო ყვავილის კვირტებივით ცეცხლის ალში ეხვევა. ნადგურდება დელიკატური, ნატიფი ყვავილების ფონზე. კლიპი სავსეა სხვადასხვა მეტაფორით, მათ შორის ალუზიით ჩემს განდეგილისებრ ცხოვრების წესზე ბოლო წლებში, განსაკუთრებით ახლა, ტოკიოში. ერთ კადრში ჩანს, როგორ იმსხვრევა ჟანგიანი ცულით ჩემი გამოსახულება სარკეში; ამის შემდეგ თითქოს ვთავისუფლდები იმ სახელებისგან, რაც კლანჭებით მომეკერა და შემეზარდა. თითქოს ჩემი თავი ხელახლა ვიპოვე და ძლიერ შევიყვარე. მეორე კადრში, კუნძულზე ცეკვისას, ძალიან შეუმჩნევლად, კედელზე ნახატის ჩარჩოში ვჯდები, რაც იმას ნიშნავს, რომ ჩარჩოში არყოფნაც ისეთივე კონცეფციაა, როგორიც ჩარჩოში ყოფნა. რაც არ უნდა ვიტრიალოთ, კონცეფციების ენას ვერსად გავექცევით – მე, შენ, ჩარჩო. რეალობა მხოლოდ მთვარეზე მიმანიშნებელი თითია, უბრალოდ სიტყვები და კონცეპტები, სიტყვები და კონცეპტები…“ – Melqo.
ნახეთ Melqo-ს ახალი სიმღერა და ვიდეოკლიპი Crysis Crysis:
