სტეფანე და Mamaflex ერთობლივ მუსიკალურ ვიდეოს წარადგენენ. კლიპის პრემიერა 3 ივნისს შედგება, ხოლო სიმღერა ცოცხლად პირველად 5 ივნისს, სტეფანეს კონცერტზე შესრულდება, რომელიც Spacehall-ში გაიმართება. როგორც სტეფანე ინსტაგრამზე გამოქვეყნებულ ვიდეოში ამბობს, კლიპზე მუშაობა ახლაც მიმდინარეობს და მას რეჟისორი გიორგი მეშველიანი (avi.musaifi) იღებს.
„ეს არის ექსპერიმენტი ჩემთვის, Mamaflex-ისთვის, ასევე რეჟისორისთვის და ამ ყველაფერს დიდი ენთუზიაზმით ვეკიდებით. 3 ივნისს გამოდის ვიდეო, 5 ივნისს კი Mamaflex-იც შემომიერთდება კონცერტზე,” – მიმართავს მსმენელს სტეფანე.
ჯერჯერობით უცნობია დეტალები ნამუშევრის შესახებ, მათ შორის სიმღერის სათაური, ჟანრობრივი მიმართულება და ვიზუალური კონცეფცია. აღსანიშნავია, რომ ეს პირველი შემთხვევაა, როდესაც სტეფანე და Mamaflex მსმენელს კოლაბორაციას წარუდგენენ.
