თბილისში თანამედროვე მუსიკის მოყვარულებს განსაკუთრებული საღამო ელით – სცენაზე ერთდროულად პიანისტი და კომპოზიტორი ლუკა თოფურია და არტისტი ნიკალა ზუბიაშვილი წარდგებიან.
ლუკა თოფურია თანამედროვე ჯაზსცენაზე უნიკალური საშემსრულებლო ხელწერით გამოირჩევა. არტისტის ალბომი Basement Membrane კი ნათლად ასახავს მუსიკოსის ღრმა ინტერესს თანამედროვე ბგერითი ესთეტიკისა და ცოცხალი მუსიკალური ინტერაქციის მიმართ, რაც მას ქართული ჯაზის ერთ-ერთ ყველაზე პერსპექტიულ არტისტად აყალიბებს.
საღამოს მსმენელის წინაშე ასევე წარდგება NIKALA – (ნიკალა ზუბიაშვილი) მულტიინსტრუმენტალისტი არტისტი, პროდიუსერი და ერთ-ერთი ყველაზე საინტერესო ახალგაზრდა მუსიკოსი თბილისის თანამედროვე სცენიდან. მისი შემოქმედება ჯაზს, სოულს, R&B-ის, ჰიპ-ჰოპსა და ელექტრონულ მუსიკას აერთიანებს. NIKALA ჟანრობრივად მოქნილ და თანამედროვე მუსიკალურ იდენტობას ქმნის.
ღონისძიება, რომელიც Telegraph Hotel-ის თავზე მდებარე Rolling Stone-ის რუფტოპ ბარში გაიმართება, სტუმრებს განსაკუთრებულ გარემოს სთავაზობს. 23 მაისს საღამოზე დასწრება თავისუფალია, თუმცა მოქმედებს ასაკობრივი შეზღუდვა (25+), კარი კი 19:00 საათიდან გაიღება.
აღსანიშნავია, რომ Rolling Stone მსოფლიოში პირველი რუფტოპ ბარია, რომელიც ლეგენდარული ბრენდის სახელით ოპერირებს. ეს არის ადგილი მათთვის, ვისთვისაც გართობა და ხარისხიანი მუსიკა ერთმანეთთან განუყოფელ კავშირშია.
