პირველი შემთხვევა არ არის, როცა მობი დონალდ ტრამპის ადმინისტრაციას მწვავედ აკრიტიკებს.
„აშშ-ს მიწასთან ასწორებს უკიდურესად არაკომპეტენტური და კორუმპირებული ადმინისტრაცია,” – წერს მუსიკოსი სოციალურ ქსელში გამოქვეყნებულ პოსტში. „დაუჯერებლად ბნელი დროა.”
მობი საკითხს ვიდეოს საშუალებითაც განავრცობს, რომელშიც ის დანარჩენ მსოფლიოს მიმართავს, რომ თავადაც ისეთივე დაბნეულია, როგორც ისინი.
„ჩემი ბევრი მეგობარი, ვინც აშშ-ის ფარგლებს გარეთ ცხოვრობს, გამუდმებით მეკითხება: ‘რა ჯანდაბა ხდება აშშ-ში?’ სიმართლე კი ისაა, რომ ჩვენც არ ვიცით,” – განმარტავს მობი. „აშშ-ს მიწასთან ასწორებს ყველაზე კორუმპირებული, ბოროტი და არაკომპეტენტური ადმინისტრაცია. და არავინ იცის, რა ხდება. ბნელი დრო უდგას აშშ-ს.”
მობი შეუერთდა იმ არტისტების მზარდ რიცხვს, რომლებიც თავიანთ პლატფორმას ტრამპისა და MAGA-ს (Make America Great Again) კრიტიკისთვის იყენებენ. სია მოიცავს ისეთ მუსიკოსებს, როგორებიც არიან ბრიუს სპრინგსტინი, ჯეკ უაიტი, ემინემი და ბილი აილიში.
წლის დასაწყისში მობიმ სოციალურ ქსელში განცხადება გამოაქვეყნა, სადაც საუბრობდა იმაზე, თუ როგორ შეეძლოთ ადამიანებს, რეაგირება მოეხდინათ საიმიგრაციო სამსახურის აგენტების მიერ ალექს პრეტის მკვლელობაზე მინეაპოლისში. „კითხვა ის კი არ არის, უნდა ვიყოთ თუ არა განრისხებული და შეშფოთებული იმით, რაც აშშ-ში ხდება, არამედ ის, თუ რის გაკეთებას ვაპირებთ ჩვენ ამის პასუხად.”
მუსიკოსმა შესაძლო გამოსავალზეც ისაუბრა და ადამიანებს პროტესტისკენ მოუწოდა. მისი თქმით, „პროტესტი კონტიტუციური უფლებაა, რომლის წართმევასაც ტრამპი და მისი ადმინისტრაცია ცდილობენ.”
საბოლოოდ კი ის მოუწოდებდა ადამიანებს, ხმა მიეცათ არა მხოლოდ მოახლოებულ შუალედურ არჩევნებზე, არამედ ყველა არჩევნებზე, რომლებიც წლის განმავლობაში ტარდება. მობიმ ასევე საზოგადოებას ურჩია, შეეწყვიტათ იმ კორპორაციების მხარდაჭერა, რომლებიც ტრამპისა და საიმიგრაციო სამსახურის მხარდამჭერები არიან. „ყველამ ვიცით, ვინ არიან ისინი. ბოიკოტი გამოვუცხადოთ მათ.”
მობის უკანასკნელი კომენტარები მოჰყვა აშშ-ის დეპარტამენტის განცხადებას 1.8-მილიარდიანი ფონდის შექმნის თაობაზე, რომლითაც კომპენსაციებს მიიღებენ ტრამპის ის მოკავშირეები, რომლებიც ამტკიცებენ, რომ მათ წინააღმდეგ უსამართლო ფედერალური გამოძიება ჩატარდა. ამ დროს კი ჰორმუზის სრუტე კვლავ დახურული რჩება, რაც იწვევს საწვავის ფასის ზრდას მსოფლიოს მასშტაბით მას შემდეგ, რაც აშშ-მ და ისრაელმა თებერვლის ბოლოს ირანის წინააღმდეგ სამხედრო კამპანიები კონგრესის წინასწარი თანხმობის გარეშე დაიწყეს.
მობი დამოუკიდებელი არტისტია, რომლის 10 ალბომი Billboard 200-შია შესული. მას ასევე აქვს Billboard Hot 100-ის ორი ჰიტი და უამრავი მუსიკა, რომელიც სხვადასხვა პროექტშია გამოყენებული. ოკეანის მეორე მხარეს კი მობი მისი თაობის ერთ-ერთ ლიდერად მიიჩნევა. დიდ ბრიტანეთში მას ჩარტის ორი ლიდერი ალბომი აქვს – 1999 წლის Play და 2002 წლის „18”. ის ასევე 18-ჯერ მოხვდა სინგლების ჩარტის ტოპ 40-ში და ორჯერ იყო წარდგენილი BRIT Awards-ის საუკეთესო საერთაშორისო მამაკაცი მუსიკოსის ნომინაციაზე.
ნახეთ მობის პოსტი:
