ქართველმა არტისტმა RIHA-მ, იგივე რატი ონიანმა, 26 მაისს მეხუთე სტუდიური ალბომი, სახელწოდებით V გამოუშვა. ეს ნამუშევარი ერთდროულად მუსიკალურ და კინემატოგრაფიულ პროექტს წარმოადგენს. ალბომი მისი საავტორო დოკუმენტური ფილმისთვის შექმნილი საუნდტრეკების კრებულია და ავტორის ბაბუას, მოქანდაკე ვახტანგ ონიანს ეძღვნება.
ალბომი 17 კომპოზიციას აერთიანებს და, როგორც თავად არტისტი აღნიშნავს, ეს მისი პირველი კონცეპტუალური ნამუშევარია, სადაც მუსიკა კონკრეტულ ნარატივს მიჰყვება და ვიზუალურ ისტორიასთან მჭიდროდაა დაკავშირებული.
RIHA – მუსიკოსი:
„ალბომი V რიგით მეხუთე სტუდიური ალბომია. ის ვახტანგ ონიანს ეძღვნება და რიჰას პირველი კონცეპტურალური ალბომია, რომელიც ასევე საუნდტრეკია დოკუმენტური ფილმის, რომელზეც თავად ვიმუშავე. ალბომში 17 კომპოზიციაა, 2 მათგანის შესრულებაში ჩემი მეგობარი მუსიკოსები, მიკანო ტვილდიანი და საყვირზე პატრიკ მაკგოვერნი მონაწილეობენ. ყველა კომპოზიციას სვანური სახელი დავარქვი და რამდენიმე მათგანს ბაბუის მიერ 60-70-იან წლებში პირველად დასურათებელი და ლიტერატურულად დამუშავებული სვანური მითოლოგიური პერსონაჟების სახელები ჰქვია, მაგალითად: ბეთქილ, გივერგილ, ლადლერ, ყანსავ და ლოგუშედა. მე ვეცადე, წარმომედგინა ბაბუას ბავშვობა მუსიკალურად და მისი გრძელი ცხოვრება, ინდივიდუალიზმით გამორჩეულ ქართველ მოქანდაკეთა და მხატვართა რთულ, მაგრამ ლამაზ გზაზე. ალბომზე დიდი გავლენა მოახდინა იმ მომენტმა, როდესაც ვატიკანში, წმინდა პეტრეს ტაძარში, მესას და საორღანო შესრულებას დავესწარი და ალბომში ბაროკოს ელემენტები გამოვიყენე. ბავშვობიდან მიყვარდა Deep Purple-ის ორღანისტი ჯონ ლორდი, რომელიც უნიკალური ჟღერადობის მუსიკოსად მიმაჩნია. დოკუმენტურ ფილმს რაც ეხება, მოვიარე მთელი სვანეთი და უამრავი მასალა დავამუშავე, რომლებიც ეროვნულ და პირად არქივებში მოვიპოვე.”
მოისმინეთ მუსიკოსის ახალი ალბომი – V.
