მუსიკალური პროექტი midnite spagetti ახალ სინგლსა და ვიდეოკლიპს აქვეყნებს. სიმღერა, სახელწოდებით me and no one else 29 მაისს გამოვიდა და ის ბასკის, გერმანიაში მოღვაწე არტისტის კონცეპტუალური ნამუშევარია.
ტრეკი პირად და სოციალურ სივრცეებში ადამიანის თვითგამოხატვის თემებს ეხება. არტისტი ყურადღებას ამახვილებს იმ „ნიღბებზე“, რომლებსაც ადამიანები ყოველდღიურ ცხოვრებაში ირგებენ, ეს იქნება ურთიერთობები, სამსახური თუ საზოგადოება.
ბასკი – მუსიკოსი (midnite spagetti):
„სიმღერისა და კლიპის კონცეპტი „მასკინგზე” მოგვითხრობს. მგონია, რომ ჩვენ ყველანი ხანდახან მეგობრებთან, სამსახურში და პირად ურთიერთობებშიც ვიკეთებთ ნიღაბს. ზოგს მთელი ცხოვრება უწევს ამ ნიღბის ტარება, ზოგს კი გაგვიმართლა, რომ ხანდახან მისი მოხსნა შეგვიძლია, მაგალითად, მუსიკის კეთების დროს. ერთ დღესაც ვფიქრობდი ისეთ სამყაროზე, რომელიც მიგვიღებს ისეთებს, როგორებიც ვართ და რა კარგი იქნებოდა, რომ ვყოფილიყავი მარტო მე – me and no one else. აქედანაც, მეტაფორად, კლიპში ქაღალდის ნიღბები გამოვიყენეთ.
სიმღერაზე ვმუშაობდით: მე, Cameron Laing (პროდიუსერი), ილია მურზინოვი ბასზე, მარსელ ბრედოლი – გიტარის სოლოზე, სალომე აფხაზავა (საბურთალოური) ბექ-ვოკალით და გეიბ მილერი ვიოლინოზე. ამჟამად ბერლინში შევკრიბეთ ბენდი ქართული core-ით: ბექა ღლონტი (Backwarmer) გიტარაზე, თორნიკე მარგველაშვილი (Mess Montage, Pornopoezia) გიტარაზე, ანდრეა ბუჩიო ბასზე და ბარნი რაილი დრამზე. ვემზადებით პირველი კონცერტისთვის და ვწერთ ახალ სიმღერებს.“
ბერლინში დაარსებული მულტინაციონალური ბენდი ამჟამად აქტიურად მუშაობს ახალ მასალაზე და პარალელურად თავისი პირველი სადებიუტო ლაივ-კონცერტისთვის ემზადება, რომელიც პროექტის ახალ ეტაპს დაუდებს სათავეს.
მოისმინეთ midnite spagetti-ს ახალი სინგლი me and no one else:
