ხვიჩა კვარაცხელიას „პარკ დე პრენსზე” „მგზავრების” სიმღერის ფონზე დახვდნენ. ბუდაპეშტში, პუშკაშ არენაზე მოპოვებული გამარჯვების შემდეგ „პარი სენ-ჟერმენი” სახლში დაბრუნდა და გულშემატკივარს მშობლიურ სტადიონზე შეხვდა. მოედანზე ფეხბურთელები ინდივიდუალურად, ნუმერაციის მიხედვით გამოდიოდნენ. თითოეულის გამოსვლას კი ფონად მათ მიერ არჩეული მუსიკალური კომპოზიცია გასდევდა.
„საქართველო მისი სამშობლოა, პარიზი კი მისი სახლი გახდა. ჩვენი შვიდი ნომერი – ხვიჩა კვარაცხელია!” – გამოაცხადა კომენტატორმა და მოედანზე ქართველი ფეხბურთელი „მგზავრებისა” და ტაჰას სიმღერის, „სახლის” ფონზე წარდგა.
როგორც ჩანს, „სახლი” კვარაცხელიას ერთ-ერთი საყვარელი სიმღერაა. სწორედ მის ფონზე გამოაქვეყნა ეროვნული ნაკრების ახალმა კაპიტანმა პოსტი 26 მარტის საქართველო-ისრაელის ამხანაგური მატჩის შემდეგაც.
30 მაისს ქართველმა ფეხბურთელმა ზედიზედ მეორე ჩემპიონთა ლიგა მოიგო. ამჯერად, ტურნირის საუკეთესო ფეხბურთელის წოდება კვარაცხელიას ერგო. „პარი სენ-ჟერმენმა” „არსენალი” პენალტების სერიაში, ანგარიშით 4:3, დაამარცხა.
