A$AP Rocky ნიუ-იორკის მერის არჩევნებში მონაწილეობას გეგმავს და მზადაა, მოქმედ მერს, ზოჰრან მამდანის რეპ-ბეთლშიც კი დაუპირისპირდეს. აღსანიშნავია, რომ მამდანი წარსულში თავადაც რეპავდა.
მოქმედი მერი A$AP Rocky-ს რეპში დაპირისპირების მზადყოფნას გამოეხმაურა და აღიარა, რომ Rocky მას აუცილებლად დაამარცხებს.
„მერმა მამდანიმ კარგად იცის, რომ Lord Flacko-სთან რეპ-ბეთლს წააგებს,“ – განაცხადა მერის პრესმდივნის მოადგილემ, ჯერემი ედვარდსმა Billboard-თან საუბრისას.
მიუხედავად ამისა, პრესმდივნის მოადგილემ აღნიშნა, რომ მერს იმედი აქვს, მომავალში Rocky-სთან ერთად იმუშავებს, რათა ნიუ-იორკი ადგილობრივებისთვის უფრო იაფ და საცხოვრებლად უკეთეს ქალაქად აქციონ.
მამდანისა და Rocky-ს შორის ეს მეგობრული კონკურენცია Met Gala-ზე დაიწყო, სადაც რეპერს მერთან შესაძლო ბეთლზე ხუმრობით ჰკითხეს. თემა კვლავ აქტუალური გახდა ამ კვირის დასაწყისში, როცა ჟურნალ VIBE-ში Rocky-ს ინტერვიუ გამოქვეყნდა.
„მამდანი ჩემამდე ვერ მოვა. მის ადგილს უკვე ვუმიზნებ, სადღაც ოთხ წელიწადში მერი მაიერსი (რეპერის ნამდვილი გვარი) ვიქნები. თუ ბეთლი უნდა, არ ვარ წინააღდეგი, შევეჯიბროთ და თუ დებატები უნდა, არც ეგ არის პრობლემა,” – თქვა A$AP Rocky-მ.
რეპერმა კიდევ ერთხელ დაადასტურა, რომ მერობისთვის ბრძოლას სერიოზულად აპირებს: „ხუმრობის გარეშე, მართლა ვაპირებ კენჭისყრას. დაელოდეთ და ნახეთ, რა მოხდება.“
ამჟამად არტისტი ახალი ალბომის მხარდამჭერ მსოფლიო ტურნეშია. 4 ივნისს ის ფილადელფიაში მართავს კონცერტს, შემდეგ კი ნიუ-იორკში ბრუნდება, სადაც 7ივნისს ქუინსში, ფესტივალ Governors Ball-ზე მთავარი შემსრულებელი იქნება.
შეგახსენებთ, რომ 8-წლიანი პაუზის შემდეგ, A$AP Rocky-მ იანვარში ახალი ალბომი – Don’t Be Dumb გამოსცა, რომელმაც Billboard 200-ის ჩარტებში პირველი ადგილი დაიკავა.
