ქართულ ელექტრონულ მუსიკალურ სივრცეში ახალი რელიზი, Against გამოიცა, რომელიც დავით (ცო) ცინცაძის პირველი სოლო EP-ია.
ტექნო ჟანრის EP-ზე მუშაობა ნახევარ წელს გრძელდებოდა და მისი კონცეფცია ბოლო ერთი წლის განმავლობაში მიმდინარე საპროტესტო ტალღასა და წინააღმდეგობის მოძრაობას ეძღვნება. ალბომის დოკუმენტური ხასიათის უკეთ გამოხატვისთვის, მასში გამოყენებული არაერთი სემპლი და აუდიო ეფექტი უშუალოდ საპროტესტო აქციებზეა ჩაწერილი.
პროექტის ვიზუალურ გაფორმებაზე ფოტოგრაფმა ტბელ აბუსერიძემ იმუშავა, რომლის ფოტოც ალბომისა და მომავალი ვინილის მთავარ ყდაზეა გამოყენებული.
„15+ წლის წინ, როდესაც მუსიკის სფეროში პირველ ნაბიჯებს ვდგამდი, ვინმეს რომ ეთქვა, შენი პირველი სოლო რელიზი ტექნო EP იქნებაო, ძალიან გამეცინებოდა, მაგრამ Never Say Never და ახლა ასე ვფიქრობ, რომ ამ დროში და კონტექსტში ტექნო ყველაზე სწორი ჟანრია იმის გამოსახატად და აღსაწერად, რისი აღწერა/გამოხატვაც მინდოდა,” – წერს დავით (ცო) ცინცაძე.
Against ამჟამად ციფრულ მუსიკალურ პლატფორმებზეა ხელმისაწვდომი, უახლოეს მომავალში კი მისი ფირფიტაზე გამოცემაც იგეგმება.
დავით (ცო) ცინცაძე პროდიუსერი, ასევე ფესტივალ Tbilisi Open Air-ის ერთ-ერთი ორგანიზატორი და მუსიკალური დირექტორია.
