1-ელ და 2 ივლისს თბილისის ოპერის თეატრში ვერდის „ტრავიატა” შესრულდა. წარმოდგენის დამდგმელი რეჟისორი ზაზა აზმაიფარაშვილი, ხოლო ქორეოგრაფი ნინო ანანიაშვილი იყო. სპექტაკლი ოთხ აქტად გაიმართა. თითოეულ დღეს მაყურებლის წინაშე სხვადასხვა დასი წარდგა.
2 ივლისის წარმოდგენა განსაკუთრებული იყო დირიჟორ რევაზ ჯავახიშვილისთვის, რომლისთვისაც ეს თბილისის ოპერის თეატრის სცენაზე დებიუტი იყო. შთაბეჭდილებებსა და სამომავლო გეგმებზე დირიჟორს Billboard საქართველო ესაუბრა.
რევაზ ჯავახიშვილი:
„თბილისი ოპერის თეატრის დასთან მანამდეც მითანამშრომლია. ჩვენ ერთად ორ სპექტაკლზე ვიმუშავეთ: პუჩინის „მადამ ბატერფლაი” და ლეონკავალოს „ჯამბაზები”. თუმცა იმ პერიოდში ოპერის შენობაში რეაბილიტაცია მიმდინარეობდა, ამიტომ ეს ყველაფერი სხვა სივრცეში ხდებოდა. 2 ივლისის სპექტაკლი კი ჩემთვის ოპერის თეატრის სცენაზე დებიუტი იყო. პირველად ვიყავი მის საორკესტრო ორმოში, რაც ძალიან სასიამოვნო და ამაღელვებელი იყო. მადლიერი ვარ ყველასი სცენაზე და სცენის მიღმა. პირველ რიგში, ბატონი ბადრი მაისურაძისა და ზაზა აზმაიფარაშვილის, რომელთა უშუალო მოწვევითაც ვიმყოფებოდი იქ. ეს ჩვენი პირველი თანამშრომლობა იყო და იქიდან გამომდინარე, თუ როგორი გამოხმაურება მოჰყვა წარმოდგენას მაყურებლის მხრიდან, ვიმედოვნებ, რომ ეს თანამშრომლობა მომავალშიც გაგრძელდება. ასევე მინდა, მადლობა გადავუხადო ქუთაისის ოპერის თეატრის დირექტორს, ირინე ლომინაძეს.”
ამჟამად რევაზ ჯავახიშვილი ქუთაისის ოპერის თეატრის მუსიკალური ხელმძღვანელისა და მთავარი დირიჟორის პოსტს იკავებს. მისი სამომავლო გეგმებიც სწორედ ამ თეატრს უკავშირდება.
„ჩვენი თეატრიც ამჟამად რეაბილიტაციის პროცესშია. დასი კი დროებით მესხიშვილის სახელობის დრამატულ თეატრში მუშაობს, სადაც წარმოდგენებს საკონცერტო შესრულებით ვმართავთ. წლევანდელი სეზონის დახურვა 24 ივლისს, ტრადიციულად, „დაისით” შედგება. მომავალი სეზონიდან კი, ვიმედოვნებთ, რომ სახლში დავბრუნდებით და შემდეგ უკვე ძალიან ინტენსიური და საინტერესო ცხოვრება გველის.
ზოგადად, ყველაზე მთავარი ნიშა, რაც ჩვენს თეატრს უჭირავს, ისაა, რომ ის წარმოადგენს ეროვნულ თეატრს, რომელშიც სრულად არის წარმოდგენილი ქართული საოპერო შედევრები, რომლებიც, უკვე დიდი ხანია, თბილისის ოპერის თეატრში აღარ დადგმულა. ჩვენ თითქმის ყველა ღირებული და მაყურებლის საყვარელი ნაწარმოები გვაქვს რეპერტუარში და ამ კურსს აუცილებლად განვაგრძობთ.
საინტერესო სიახლეა ისიც, რომ ოქტომბერში მემორანდუმის გაფორმებას ვგეგმავთ ერთ-ერთ ევროპულ თეატრთან, რითაც გვინდა, რომ საერთაშორისო ასპარეზზე გავიდეთ და ჩვენი თეატრი სხვა საფეხურზე გადავიყვანოთ. ველით, რომ სხვანაირი ყურადრება წამოვა ქუთაისის საოპერო თეატრის მიმართ.
ზოგადად, ვფიქრობ, უფრო მეტი მხარდაჭერაა საჭირო თეატრებისა და თეატრალური ცხოვრების მიმართ. განსაკუთრებით გამოვყოფდი მუსიკალურ თეატრებს – ის მოიცავს შემოქმედებითი პროფესიების ძალიან ფართო სპექტრს, რომლებიც, შეიძლება ითქვას, რომ უკვე მომაკვდავ მდგომარეობაშია და გადარჩენა სჭირდება. არის პროფესიები, სადაც თითო-ოროლა ადამიანიღაა დარჩენილი და ისინი რომ აღარ იქნებიან, ცოდნას ვეღარავის გადასცემენ. ამ ყველაფერს სერიოზული მიხედვა უნდა. ამიტომ, გამოვიყენებ შესაძლებლობას და ვთხოვ ყველას, გამოიჩინონ კეთილი ნება და გახდეს პრიორიტეტული, რომ თეატრალურმა ცხოვრებამ სწორად და გამართულად იფუნქციონიროს, როგორც ტექნიკურად, ასევე შემოქმედებითად. ამისთვის კი ერთად უნდა დავდგეთ და მოვიფიქროთ გამოსავალი, რომელიც არა ახლა, არამედ 10 და 20 წლის შემდეგ მოგვცემს ძალიან კარგ ნაყოფს. მაგრამ პროცესი აუცილებლად უნდა დაიწყოს და დაიწყოს რაც შეიძლება მალე.”
ამჟამად რევაზ ჯავახიშვილი თბილისში მომდევნო ღონისძიებისთვის ემზადება. 6 ივლისს ის კახა ცაბაძის შემოქმედებით საღამოზე იდირიჟორებს, რომელიც რუსთაველის თეატრში შედგება.
ფოტო: თბილისის ოპერისა და ბალეტის თეატრი
