50 Cent-მა განაცხადა, რომ ფილმ Street Fighter-ის საუნდტრეკისთვის ემინემის და 2Pac-ის კოლაბორაციას ამზადებს. რეპერმა ეს სიახლე 24 ივლისს, გადაცემაში Today With Jenna and Sheinelle სტუმრობისას გაასაჯაროვა.
„ახალ მუსიკაზე ვმუშაობ. ჩავწერე ტრეკი, რომელიც ჩემს, ემინემის და 2Pac-ის ჩანაწერს შეიცავს,” – თქვა მან, რამაც წამყვანების დაბნეულობა გამოიწვია.
50 Cent-მა განმარტა, რომ თანხმობა 2Pac-ის მემკვიდრეობის მმართველებისგან მიიღო და რომ გარდაცვლილი რეპერის პარტია ტრეკში ხელოვნური ინტელექტით არ არის შექმნილი. „ეს ტრეკი ფილმ Street Fighter-ის მთავარი თემა იქნება. ყველაფერი იდეალურად გამოვიდა,” – აღნიშნა 50 Cent-მა.
რეპერის თქმით, ეს კოლაბორაცია უახლოეს მომავალში გამოვა და აუდიტორია მის მოსმენას შეძლებს.
რაც შეეხება ფილმს – Street Fighter, მისი პრემიერა შეერთებული შტატების კინოთეატრებში 2026 წლის 16 ოქტომბერსაა დაგეგმილი და მასში 50 Cent მონაწილეობს. მასთან ერთად, რიმეიქის ვარსკვლავურ სამსახიობო შემადგენლობაში ასევე არიან: ჯეისონ მომოა, ნოა სენტინეო, მომღერალი ორვილ პეკი და WWE-ის სუპერვარსკვლავი რომან რეინსი.
ჯერ კიდევ დეკემბერში რეპერმა მიანიშნა, რომ ამ კინოპროექტის ფარგლებში ემინემთან ითანამშრომლებდა, თუმცა 2Pac მაშინ არ უხსენებია. ბოლო ერთობლივი ნამუშევარი, რომელიც 50 Cent-მა და ემინემმა გამოსცეს, იყო ტრეკი, სახელწოდებით Gunz N Smoke. სინგლი 2024 წლის დეკემბერში Dr. Dre-სა და Snoop Dogg-ის კოლაბორაციულ ალბომში, Missionary-ში შევიდა.
50 Cent-ს და ემინემს ახლო მეგობრობაც აკავშირებთ. მათ წარსულში არაერთხელ უთანამშრომლიათ. არტისტებმა 2000-იან წლებში გამოსცეს ისეთი ტრეკები, როგორებიცაა: Don’t Push Me, Patiently Waiting, Gatman & Robin და You Don’t Know.
ნახეთ ვიდეო, სადაც 50 Cent ემინემთან და 2Pac-თან კოლაბორაციულ ტრეკზე საუბრობს:
