Fleetwood Mac-ის Greatest Hits-ის ხელახალი ვერსის გამოშვების შემდეგ, ალბომი, რომელიც თავდაპირველად 1988 წელს გამოვიდა, პირველად შევიდა „ბილბორდის” 35-წლიანი ისტორიის მქონე ტოპ გაყიდვადი ალბომების ჩარტში.
მას შემდეგ, რაც 7 ჰიტი დაემატა და ციფრულ და ფიზიკურ ფორმატებში გამოიცა, ჩანაწერმა ჩარტში მეათე პოზიცია დაიკავა, რითაც თავისი წინა, 2016 წლის შედეგი – მე-13 პოზიცია გააუმჯობესა.
Greatest Hits ასევე მნიშვნელოვნად დაწინაურდა Billboard 200-ში და 69-ე პოზიციიდან მე-13-ზე გადაინაცვლა. ალბომს ასევე ახალი რეკორდი აქვს ვინილების ჩარტში, სადაც ამჯერად მე-5 ადგილს იკავებს (2019 წელს ის მე-7 ადგილზე გავიდა). ასევე მე-18-დან მეოთხეზე გადაინაცვლა როკისა და ალტერნატიული ალბომების ჩარტში, ხოლო მე-14-დან მესამეზე – ტოპ როკალბომების ჩარტში.
Greatest Hits-ის თავდაპირველი, სტანდარტული ვერსია 16 სიმღერას მოიცავს, ხოლო მის ახალ, დელუქს გამოცემაში კიდევ 7 სიმღერაა დამატებული. ალბომი სტრიმინგ სერვისებზე 10 ივნისს, ხოლო ფიზიკურ ფორმატში 31 ივლისს გამოვიდა.
6 აგვისტოთი დათარიღებულ კვირაში აშშ-ში ალბომის 6000-მდე ასლი გაიყიდა, რაც წინა კვირასთან შედარებით 286%-იანი ზრდაა.
ტოპ გაყიდვადი ალბომების ჩარტში, სადაც Greatest Hits მეათე ადგილს იკავებს, არიანა გრანდე უკვე მერვედ ახერხებს ლიდერობას ახალი ალბომით Petal. გარდა ამისა, Shaboozey კარიერაში საუკეთესო შედეგს აფიქსირებს – მისი ახალი ალბომი The Outlaw Cheri Lee & Other Western Tales მეოთხე პოზიციაზეა.
