გაუქმებული კონცერტების შემდეგ როდ სტიუარტი ფანებს დამაიმედებელ ინფორმაციას აწვდის. თუმცა, მიუხედავად ამისა, მას ოთხი კვირის განმავლობაში სცენისგან ჩამოშორება მოუწევს, რათა ცოტა ხნის წინ ჩატარებული გულის სტენტირების შემდგომი რეაბილიტაცია გაიაროს.
მუსიკოსმა წარმატებით ჩაიტარა გეგმიური კორონარული სტენტირება და „ბილბორდისთვის” მოწოდებული ინფორმაციის თანახმად, გამოჯანრმრთელების პროცესშია.
„მორიგი სამედიცინო შეფასების შემდეგ, სერ როდ სტიუარტს წარმატებით ჩაუტარდა კორონარული სტენტირების პროცედურა,” – ვკითხულობთ განცხადებაში. „ექიმები მოხარული არიან მისი გამოჯანმრთელებით. როდი თავს კარგად გრძნობს და ყოველდღიურ აქტივობებს უბრუნდება. ექიმების რჩევით, მომდევნო ოთხ კვირას ის რეაბილიტაციასა და ძალების აღდგენას დაუთმობს, შემდეგ კი სცენას დაუბრუნდება. სამწუხაროდ, ეს ნიშნავს, რომ მიმდინარე ტურნეს ფარგლებში დაგეგმილი კონცერტების გამართვას ვეღარ შეძლებს.”
განცხადება ასევე მოიცავს თავად მუსიკოსის ციტატას: „თავს უკვე კარგად ვგრძნობ. მინდა, მადლობა გადავუხადო ექიმებს, ექთნებსა და ყველას, ვინც ასე ზრუნავდა ჩემზე. ძალიან იმედგაცრუებული ვარ, რომ კონცერტების გაცდენა მიწევს და ვწუხვარ, რომ ფანებს იმედები გავუცრუე, მაგრამ მოუთმენლად ველი სცენაზე დაბრუნებას და თქვენთან ერთად კვლავ შესანიშნავი დროის გატარებას.”
One Last Time Tour-ის ფარგლებში სტიუარტს შემდეგი კონცერტები 14 და 15 აგვისტოს ჰქონდა დაგეგმილი. 18 აგვისტოს კი ლას-ვეგასში მისი Encore Shows რეზიდენცია უნდა განახლებულიყო. ჩრდილოამერიკული ტურნეს გაგრძელებას მუსიკოსი პირველ სექტემბერს გეგმავდა.
ტურნეს იმ თარიღებთან დაკავშირებით, რომელთაც ცვლილება შეეხებათ, დამატებითი ინფორმაცია უახლოეს მომავალში გავრცელდება.
