სემ სმითი ემოციურად საუბრობს იმ მხარდაჭერაზე, რომელიც პოპმუსიკის ერთ-ერთი ყველაზე გავლენიანი ლეგენდისგან მიიღო. Apple Music-თან ახალ ინტერვიუში მუსიკოსმა საკუთარ კარიერაზე მადონას გავლენის შესახებ ისაუბრა და გაიხსენა, რომ პოპის დედოფალი მას პირადად დაუკავშირდა, როცა მომღერალი 2022 წლის ჰიტის, Unholy-ს გარშემო გაჩაღებული კრიტიკის ცენტრში მოექცა. სიმღერა სმითმა კიმ პეტრასთან ერთად ჩაწერა და Billboard Hot 100-ის ლიდერიობაც მოიპოვა.
„მადონა ჩემთვის დედაა,” – თქვა სმითმა იმ მუსიკაზე საუბრისას, რომელსაც ამჟამად უსმენს. „ის უბრალოდ არარეალურია.”
მომღერალმა გაიხსენა, თუ როგორ უჭერდა მადონა მხარს Unholy-ს გარშემო ატეხილი დაპირისპირების დროს. გამოსვლისთანავე სიმღერა კრიტიკის სამიზნედ იქცა, რასაც ხელი შეუწყო მისმა პროვოკაციულმა ვიზუალმა და ცოცხალმა შესრულებებმა.
„როგორც კი ეს მოხდა, მან ყველაფერი გააკეთა, რომ დამკავშირებოდა. ის ძალიან კარგად არის ინფორმირებული ქვიარ სამყაროში მიმდინარე მოვლენების შესახებ და იცის, თუ რა ხდება ამ თემსა და მათ წარმომადგენელ არტისტებში.”
სმითისთვის მადონას მხარდაჭერას განსაკუთრებული ძალა ჰქონდა, იმ როლიდან გამომდინარე, რომელიც პოპის ლეგენდას ქვიარ კულტურაში უკვე დიდი ხანია, აქვს. სმითი მადონას მუსიკას „ქვიარ ადამიანების მაშველ რგოლს” უწოდებს და ხაზს უსვამს მის უნარს, მუდმივად გარდაიქმნას და ამავდროულად, მხარი დაუჭიროს LGBTQ+ თემებს.
„ამას მის მუსიკაში გრძნობ,” – ამბობს სმითი. „მისი მუსიკა ქვიარ ადამიანების მაშველი რგოლია და მისი ცხოვრების ყველა ეტაპი, მისი გამძლეობა და ის, თუ როგორ განაგრძობდა ყოველთვის წინსვლას, ჩემთვის ძალიან შთამაგონებელია.”
ორი არტისტის კავშირმა საბოლოოდ სტუდიაში გადაინაცვლა. 2023 წელს მათ გამოსცეს ერთობლივი სინგლი Vulgar – რამდენიმე თვის შემდეგ, რაც მადონამ სმითისა და პეტრასის Unholy 2023 წლის გრემიზე წარადგინა.
წარდგენისას მადონამ სმითი და პეტრასი წარმოაჩინა, როგორც არტისტები, რომლებიც კრიტიკასა და დაპირისპირებებზე მაღლა დადგნენ, რაც შემდგომში სმითის მიმართ მის ეკრანს მიღმა მხარდაჭერას კიდევ უფრო დიდ მნიშვნელობას სძენს.
სმითის უახლესი კომენტარები მას შემდეგ გავრცელდა, რაც ის მეხუთე სტუდიური ალბომის, Hazel Eyes-ის გამოსაშვებად ემზადება. ალბომი ამ პარასკევს გამოვა. ჩანაწერი მუსიკოსის ახალი ეტაპია. მისი თქმით, პროექტი უფრო ინტიმური და პირადი ნამუშევარია, რომელიც სიყვარულზე, იდენტობასა და შემოქმედებით თავისუფლებაზეა ფოკუსირებული.
მიუხედავად იმისა, რომ სმითი მომავლისკენ იყურება, მადონას მიმართ მისი აღფრთოვანება კვლავ მყარადაა ფესვგადგმული ყველაფერში, რაც მანამდე იყო. „ვფიქრობ, ბევრი ქვიარ ადამიანი შთაგონებას პოულობს მის მუსიკაში. და ეს არ არის ნუგეში მხოლოდ ჩემს პირად ცხოვრებაში, ეს არის ნუგეში ჩემს მუსიკაშიც.”
ნახეთ სემ სმითის სრული ინტერვიუ:
