Mary J. Blige მიშელ ობამასა და კრეიგ რობინსონის პოდკასტს – IMO-ს ეწვია, სადაც თავის პირად ცხოვრებაზე, კერძოდ კი იმაზე ისაუბრა, თუ რატომ არ ჰყავს ბიოლოგიური შვილები.
„ჩემ გარშემო ბევრს ვხედავდი, ვინც წვალობდა. ვხედავდი, ჩემი ოჯახის წევრებს როგორ სჭირდებოდათ ძიძები და როგორ არ ჰქონდათ არჩევანი ან თავისუფლება. როცა ახალგაზრდა ვიყავი, სწორედ ასეთი გადაწყვეტილება მივიღე: მე შვილები არ მინდა.“
არტისტმა ისიც გაამხილა, რომ ასაკის მატებასთან ერთად შვილების არყოლას ხანდახან ნანობდა კიდეც, თუმცა, საბოლოო ჯამში, მაინც ბედნიერია იმ ცხოვრებით, რაც აქვს.
„წლების მატებასთან ერთად ამჩნევ, რამდენად ძვირფასია მშობლებისთვის შვილი. ხანდახან მარტოსული ვარ, ხშირად ვარ მარტო, მაგრამ დროს მაინც კარგად ვატარებ,” – თქვა ბლაიჯმა.
მიშელ ობამამ აღნიშნა, რომ ქალები ხშირად განიცდიან ზეწოლას, თითქოს შვილების გაჩენა მათი ვალდებულება იყოს: „შენ არ ხარ ვალდებული, იყო დედა. ეს არ გაქცევს სრულფასოვან ადამიანად. თუ თავად არ ხარ სრულფასოვანი პიროვნება, ბავშვი ამას შენ ნაცვლად ვერ იზამს. ის ვერ შეგივსებს დანაკლისს.”
Mary J. Blige 2003 წელს პროდიუსერ კენდუ აიზაქსზე დაქორწინდა, თუმცა 2016 წელს განქორწინების გადაწყვეტილება მიიღო. ბლაიჯმა და აიზაქსმა ხმაურიანი დავა საბოლოოდ 2018 წელს დაასრულეს.
ამჟამად Mary J. Blige ლას-ვეგასში შოუების სერიის მორიგი ეტაპისთვის ემზადება, რომელიც 23 ოქტომბერს განახლდება. არტისტის ბოლო ალბომი – Gratitude 2024 წელს გამოვიდა. აგვისტოს დასაწყისში ის ნიუ-ჯერსიში, კრის ბრაუნისა და აშერის R&B ტურნეს კონცერტზე სპეციალური სტუმრის სტატუსითაც გამოჩნდა.
იხილეთ Mary J. Blige-ის სრული ინტერვიუ:
