კრიმინალური დაჯგუფების ყოფილი ლიდერი დუეინ დევისი 2Pac-ის მკვლელობის ორგანიზებისათვის დამნაშავედ ცნეს. ეს არის პირველი განაჩენი ამ გახმაურებულ საქმეზე, რომელიც ათწლეულების განმავლობაში გაუხსნელი იყო. ნაფიც მსაჯულთა სასამართლომ 63 წლის დევისი დამნაშავედ დამამძიმებელ გარემოებაში ჩადენილ მკვლელობაში ცნო.
დევისი უემოციოდ შეხვდა განაჩენის გამოცხადებას და იქვე აღნიშნა, რომ გადაწყვეტილების გასაჩივრებას გეგმავს. 2Pac-ის ოჯახის წევრები ამ მომენტისთვის დარბაზში იყვნენ და ემოციებს ვერ იკავებდნენ.
შაკური ცეცხლსასროლი იარაღით თავდასხმას 25 წლის ასაკში ემსხვერპლა. ამ დროს რეპერი თავისი კარიერის მწვერვალზე იყო. მას მსოფლიო მასშტაბით 75 მილიონზე მეტი ალბომი აქვს გაყიდული.
საქმის განხილვისას პროკურატურის მტკიცებით, სწორედ დევისმა გასცა მკვლელობის ბრძანება და მანვე უზრუნველყო იარაღის თავისი ძმისშვილისთვის, ორლანდო ანდერსონისათვის გადაცემა. თავდასხმა შურისძიება იყო – სროლამდე რამდენიმე საათით ადრე ანდერსონსა და თუფაქის გარემოცვას შორის ფიზიკური დაპირისპირება მოხდა.
წლების განმავლობაში ეს საქმე ამერიკის ერთ-ერთი ყველაზე საიდუმლოებით მოცული დანაშაული იყო, რომელსაც არაერთი სპეკულაცია და თეორია უკავშირდებოდა. თუფაქის მკვლელობა ემთხვეოდა ე.წ. „აღმოსავლეთ და დასავლეთ სანაპიროების” რეპერების მწვავე დაპირისპირებასა და ქუჩის დაჯგუფებებს შორის არსებულ ომს.
საქმეში მთავარი მტკიცებულება თავად დევისის აღიარებები გახდა. საქმე ეხება 2008 წლის ფარულ დაკითხვას – მან პოლიციასთან აღიარა თავისი როლი თუფაქის მკვლელობაში, როდესაც Notorious B.I.G.-ის მკვლელობას იძიებდნენ. 2019 წელს კი დევისმა ავტობიოგრაფიული წიგნი გამოსცა და მასში მომხდარი მკვლელობა აღწერა. დევისი ამ თემას მედიასთან ინტერვიუებშიც შეეხო.
მედიასა და წიგნში გაკეთებულმა საჯარო განცხადებებმა გააუქმა პოლიციასთან ადრე დადებული ხელშეკრულება, რომელიც მას სისხლისსამართლებრივი დევნისგან იცავდა. შედეგად, სასამართლომ ეს აღიარებები მტკიცებულებად ცნო.
დაცვის მხარე ცდილობდა დაემტკიცებინა, რომ დევისის ნათქვამი უბრალოდ ტყუილი და წიგნის გაყიდვების გაზრდის მცდელობა იყო, თუმცა ნაფიცმა მსაჯულებმა საქმის გადაცემიდან რამდენიმე საათში გამამტყუნებელი განაჩენი გამოიტანეს.
მოსამართლე კარლი კირნიმ სასჯელის ზომის გამოცხადების თარიღად 13 ოქტომბერი დანიშნა. სხდომის დასრულებამდე დევისმა საქმის გასაჩივრება მოითხოვა, მოსამართლემ კი განუმარტა, რომ აპელაციის ეტაპი განაჩენის საბოლოო გამოცხადების შემდეგ დაიწყება.
