Shakira და Burna Boy YouTube-ის ე.წ. „მილიარდ ნახვათა კლუბს“ გლობალური კოლაბორაციული სიმღერით, Dai Dai-ით შეუერთდნენ. სიმღერა 2026 წლის FIFA-ს მსოფლიო ჩემპიონატის ოფიციალური ჰიმნია.
23 მაისს, კლიპის გამოსვლიდან თითქმის ოთხი თვის შემდეგ, პოზიტიური და ენერგიული მუსიკალური ვიდეო, რომელშიც კოლუმბიელი და ნიგერიელი ვარსკვლავები მონაწილეობენ, იმ 10 ვიდეოს შორისაა, რომლებმაც ამ ნიშნულს ყველაზე სწრაფად მიაღწიეს. Shakira-სთვის ეს ამ კლუბში შესული რიგით მეშვიდე ნამუშევარია, ხოლო ბერნასთვის სადებიუტო სიმღერაა.
გარდა ამისა, Dai Dai YouTube-ის გლობალურ ტოპ სიმღერებში (Global Top Songs) ერთი კვირაა პირველ ადგილზეა, ხოლო აშშ-ის ტოპ სიმღერებში (US Top Songs) მეორე ადგილს იკავებს.
წლის დასაწყისში ფეხბურთით შთაგონებულმა სიმღერამ ისტორია დაწერა და მსოფლიო ჩემპიონატის პირველ ჰიმნად იქცა, რომელმაც Billboard-ის Global Excl. U.S. და Global 200 ჩარტებში პირველი ადგილი დაიკავა. ის Billboard-ის Rhythmic Airplay ჩარტშიც პირველ ადგილზე გავიდა. ეს Shakira-სთვის პირველი ლიდერობაა რადიოჩარტში, Burna Boy-სთვის კი პირველი გამარჯვება მთავარი შემსრულებლის ამპლუაში.
Dai Dai-ს YouTube-ის ე.წ. „მილიარდ ნახვათა კლუბში“ შესვლით კოლუმბიელმა ვარსკვლავმა ეს ტიტული უკვე მეშვიდედ მოიპოვა. მანამდე ამ ნიშნულს შემდეგმა ვიდეოებმა მიაღწიეს: Waka Waka (This Time for Africa), Chantaje (მალუმასთან ერთად), TQG (Karol G-სთან ერთად), Can’t Remember to Forget You (Rihanna-სთან ერთად), LaLaLa (Brazil 2014) და Perro Fiel (Nicky Jam-თან ერთად)
აღსანიშნავია, რომ „მილიარდ ნახვათა კლუბს“ სულ მალე Shakira-ს კიდევ რამდენიმე ვიდეო შეემატება: Me Enamoré, La Tortura (ალეხანდრო სანზთან ერთად), Girl Like Me (Black Eyed Peas-თან ერთად) და Whenever, Wherever, თითოეული მათგანის ნახვები უკვე 900 მილიონს აჭარბებს.
ნახეთ Dai Dai-ს მუსიკალური ვიდეო:
