The Weeknd-მა მსმენელის წინაშე აქამდე გამოუქვეყნებელი სიმღერა შეასრულა, რომელშიც ანიმეს ისტორიაში ერთ-ერთი ყველაზე ცნობილი მუსიკალური ნაწარმოების თემაა გამოყენებული. კომპოზიციის ცოცხალი პრემიერა არტისტის After Hours Til Dawn-ის აზიური ტურნეს ფარგლებში შედგა.
19 სექტემბერს, ტოკიოს მახლობლად, საიტამაში მდებარე Belluna Dome-ზე გამართულ კონცერტზე The Weeknd-მა, რომლის ნამდვილი სახელიც ეიბელ მაკონენ ტესფაიეა, აქამდე გამოუქვეყნებელი სიმღერა იაპონელ მომღერალ იოკო ტაკაჰაშისთან ერთად პირველად შეასრულა.
კომპოზიციას, სახელწოდებით Tokyo, საფუძვლად 1995 წლის J-pop ჰიტი A Cruel Angel’s Thesis უდევს, რომელიც ტაკაჰაშიმ საკულტო ანიმე-სერიალის, Neon Genesis Evangelion-ის მთავარი თემისთვის ჩაწერა.
პერფორმანსის დროს ტაკაჰაშიმ A Cruel Angel’s Thesis სრულად იმღერა, ტესფაიე კი შოუს სცენის სიღრმიდან ადევნებდა თვალს.
გამოსვლა მულტიმედიური კოლაბორაციის სახით იყო წარმოდგენილი. თანმხლები ვიზუალური ეფექტების რეჟისორი იოკო ტარო იყო, რომელიც ვიდეოთამაშების სერია NieR-ის შემოქმედებითი დირექტორია. ვიზუალურ ნაწილში გამოყენებული იყო როგორც Neon Genesis Evangelion-ის, ისე 2017 წლის თამაშის, NieR: Automata-ს ელემენტები.
ტესფაიემ სოციალურ ქსელში კომპოზიციის ავტორები მხოლოდ ასე წარადგინა: Presented by YOKO TARO ft. YOKO TAKAHASHI | „იოკო ტაროს პრეზენტაციით, იოკო ტაკაჰაშის მონაწილეობით“.
Presented by YOKO TARO ft. YOKO TAKAHASHI https://t.co/a8wUBHV7k6
— The Weeknd (@theweeknd) September 19, 2026
ეს უკვე მეორე შემთხვევაა მიმდინარე ტურნეს ფარგლებში, როდესაც The Weeknd ახალი სიმღერის დებიუტს იმ ქალაქს უკავშირებს, სადაც კონცერტს მართავს. აპრილში, რიო-დე-ჟანეიროში გამოსვლისას, მან ბრაზილიელ ვარსკვლავ Anitta-სთან ერთად აქამდე გამოუქვეყნებელი ტრეკი წარადგინა, რომელსაც მსმენელმა პირობითად Rio უწოდა.
ორივე პრემიერა განსაკუთრებით საინტერესოა იმდენად, რამდენადაც ბოლო წლებში ტესფაიე არაერთხელ მიანიშნებდა, რომ შესაძლოა The Weeknd-ის ფსევდონიმით აღარ ემუშავა. 2025 წელს გამოცემული ალბომი Hurry Up Tomorrow მან ამ ფსევდონიმით შექმნილ უკანასკნელ ნამუშევრად დაასახელა.
After Hours Til Dawn-ის ტურნე 2022 წელს დაიწყო და თავდაპირველად The Weeknd-ის 2020 წლის წარმატებული ალბომის, After Hours-ის მხარდასაჭერი ტურნე იყო, მოგვიანებით კი პროგრამაში 2022 წელს გამოცემული Dawn FM-ის მასალაც შევიდა.
სტრიმინგის ეპოქის კომერციულად ერთ-ერთ ყველაზე წარმატებულ არტისტს The Weeknd-ს Billboard 200-ის ჩარტში ხუთი პირველი ადგილი აქვს მიღებული ალბომებით: Beauty Behind the Madness (2015), Starboy (2016), My Dear Melancholy, (2018), After Hours (2020) და Hurry Up Tomorrow (2025).
Billboard Hot 100-ის პირველ ადგილზე გასულ ჰიტებს შორისაა Can’t Feel My Face, Starboy, Heartless, Save Your Tears და Blinding Lights. ამ უკანასკნელს Billboard-მა Hot 100-ის ისტორიაში ყველა დროის N1 სიმღერის სტატუსიც მიანიჭა.
