4D Monster Lobsters ნოემბერში რიგის მუსიკალურ კვირეულზე დაუკრავს. ფესტივალი 4-6 ნოემბერს გაიმართება და მასში მონაწილეობას სხვადასხვა ქვეყნის 50-ზე მეტი არტისტი მიიღებს. მათ შორის იქნება საქართველოც, რომელსაც კვირეულზე 4D Monster Lobsters წარმოადგენს.
„Tomorrowland-ის სცენიდან და BBC Radio 1-ის მაუწყებლობიდან დაწყებული, თბილისის ანდერგრაუნდ კლუბებით დასრულებული, 4 და 5 ნოემბერს რვა ქვეყნის არტისტები, ლატვიელი აუდიტორიისთვის უკვე ნაცნობ სახელებთან ერთად, შვიდ სცენაზე წარდგებიან,” – ვკითხულობთ ფესტივალის მიერ სოციალურ ქსელში განთავსებულ პოსტში.
კვირეულმა ასევე გაავრცელა ქართული ჯგუფის კონცერტის ანონსიც, რომელიც 5 ნოემბერს გაიმართება.
„4D Monster Lobsters თბილისური ინდი/ფსიქოდელიური ბენდია, რომელიც ქართულ მოტივებზე დაფუძნებულ მელოდიებს ფსიქოდელიურ ჟღერადობასა და ალტერნატიულ როკთან აზავებს. სამი ალბომითა და ისეთ მთავარ სცენებზე გამოსვლებით, როგორიცაა Tbilisi Open Air, ჯგუფი ქართულ ალტერნატიულ მუსიკალურ სცენაზე გამორჩეულ ადგილს იკავებს,” – აღნიშნულია ფესტივალის ვებგვერდზე.
წელს რიგის მუსიკალურ კვირეულზე მონაწილეობის მსურველთა რაოდენობამ 89 ქვეყნიდან 1126-ს მიაღწია. ორგანიზატორების თქმით, ეს მაჩვენებელი უპრეცედენტოა და გასულ წლის აპლიკაციების რიცხვს 86.7%-ით აღემატება. შერჩევის შედეგად გამოვლენილი 60-მდე არტისტიდან ამ ეტაპზე ოფიციალურად გამოცხადებულია 28, რომელთა შორისაცაა 4D Monster Lobsters.
